گؤزوم باخ گویلره اولدوزلاری بیر بیر سای آخشاملار
دؤنوب باخ داغ دیبیله گؤر آخیر یانه چای آخشاملار
آخار چای پارلاق اولدوزلار ساییلماز، اؤنلارین گویدن
دوشر عکسی چایا سانکی ائدرلر بای بای آخشاملار
گئجه گوندوز چکیب زحمت،اؤرکدن بو سوؤزو یازدیم
گونوز بیر پای سلامیم وار آنامه مین پای آخشاملار
سنه باخماق محبّتله آنا وآلله عبادتدیر
کی سندن نور آلیر گویا گونوزلر گون، آی آخشاملار
منی اوچ یوز گونه یاخین، دولاندیردون او بطنونده
ایکی ایلده قوجاقونده ائدوبسن نای نای آخشاملار
محبّت چشمه سی سنسن وفا و مهر اوجاقی سن
قوجاقونده یاتیرداندا اولاردی قیش یای آخشاملار
چؤرک آغزونده چِینردون قویاردون آغزیما آز آز
ازردون قندی فنجاندا ایچیردردون چای آخشاملار
آدون شیرین یادون شیرین اؤزون شیرین سؤزون شیرین
منه سن اولماسون هرگون اولار شیرین، زای آخشاملار
سنی وصف ایلمک اولماز، «بشیر»اولسون سنه قوربان
سسون قالمیش قولاقیمده چالاردون لای لای آخشاملار
گؤزل برنامه سن سنده اولورسان پخش تبریزدن
سنه آلله عومور وئرسین آی آخشاملار آی آخشاملار
بو شعری ئولن آنالارین روحلارینا و قالان آنالارین ساغلیغلارینا اتحاف ائديرم.
و دئملی یم بو شعری ۱۳۷۵ ده تبریزده یازمیشدیم رادیودان پخش اولان
آخشاملار برنامه سینه بیلمورم گنه وار یا یوخ.
سید بشیر حسینی
- یکشنبه
- 15
- فروردین
- 1400
- ساعت
- 21:5
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه