ای فاطمه نشانی! زینب رقیّه هانی؟
گئتدون بو کاروانی زینب رقیّه هانی؟
مندن صورا یانیقلی نی تک نوایه گلدوز
قیرخ گوندی لحظه لحظه دؤزدوز جفایه گلدوز
بو اربعین گونونده کرب وبلایه گلدوز
غم دوتدی کربلانی زینب رقیّه هانی؟
ای کاش اودا گلِیدی وصل عطرینی آلِیدی
ششگوشه قبریم اوسته باری اؤزون سالِیدی
اکبرله اصغریمله یانیمده او قالِیدی
ایستَر آتا بالانی زینب رقیّه هانی؟
گلسیدی کربلایه اشکی روان اولاردی
او بولبوله بو گلشن خوش آشیان اولاردی
بو کاروانه باری بیر نوحه خوان اولاردی
گلمور نیه فغانی زینب رقیّه هانی؟
اوخشوردی چوخ آنامه اُول قیز آلا گؤزوندن
دویدوم نه باخماقیندان نه بال کیمی سؤزوندن
گلسیدی بیر ئوپردیم سیلی دَگَن یوزوندن
ئولسون اونی ویرانی زینب رقیّه هانی؟
گلسیدی قبریم اوسته چوخ گول دریب ساچاردی
ای وای بابا دییردی توزلی ساچین آچاردی
عباسین آدی دیلده نهره طرف قاچاردی
سسلردی اُول جوانی زینب رقیّه هانی؟
مندن صورا دمادم سالدی قرا رقیه
غم تازه لندی گِئیدی کهنه قبا رقیه
آز سِنّیله چکوبدی چوخلی بلا رقیه
آخر یورولدی جانی زینب رقیّه هانی؟
اُول سالکِ بلایه قورتاردی منهاج، ئولدی
آخر کفندن اؤتری محنتلی محتاج ئولدی
سجّاده نیسکیل اولدی چون باجی سی آج ئولدی
آغلاتدی نُه سمانی زینب رقیّه هانی؟
حیف اولسون اولمادی او بو قبریمه مجاور
حسرتله جان وئروبدی دیدار یاره خاطر
حشره کیمی کیم اولسا کرب وبلایه زائر
یاد ایلر اُول بالانی زینب رقیّه هانی؟
یارب «بشیر»ه قسمت ایله دوباره گلسین
شوقیله اربعینده غملی دیاره گلسین
عاشقلریمله یولدان، اگنینده قاره گلسین
ذکر ایلسین هر آنی زینب رقیّه هانی؟
- چهارشنبه
- 18
- فروردین
- 1400
- ساعت
- 20:8
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه