ای شیعه دئنن حاجی سلیم ئولمیوب ئولمز
مدّاح لرین تاجی سلیم ئولمیوب ئولمز
دستمال عزا الده حسینون آدی دلده
طیّ ایلدی منهاجی سلیم ئولمیوب ئولمز
غم کعبه سینی قاره گیوب طوف ائلیوبدور
گوزیاشلی اولان حاجی سلیم ئولمیوب ئولمز
هشتاد ایل حسینون غمی قلبینده یئر ائتدی
تیر غمین آماجی سلیم ئولمیوب ئولمز
منصور «أناالحق» دئدی٬ بو سسلدی «زینب»
مات ایلیوب حلاّجی سلیم ئولمیوب ئولمز
کئچدی بو خیالیمدن٬ حسین زینبه سؤیلر
مدّاح دور ای باجی! سلیم ئولمیوب ئولمز
ییرمی ایکی گون ماه صفرده سفر ائتدی
قصد ایلدی معراجی٬ سلیم ئولمیوب ئولمز
یومدی گوزونی گوزلری آغلاتدی بولود تک
مدحین یمِ موّاجی سلیم ئولمیوب ئولمز
مثلی نه گلوبدور نه گلر عالمه الحق
آللّهه اولوب راجی سلیم ئولمیوب ئولمز
داودی٬ قیزیل حنجره سی حیرته سالمیش
ای منجی و ای ناجی! سلیم ئولمیوب ئولمز
سؤندی دئسم انصاف دگول شمعِ صداسی
سس بحرینون امواجی سلیم ئولمیوب ئولمز
هردن قولاق آس دقتیله «اکبره باخه»
عشقین قَوی لیلاجی سلیم ئولمیوب ئولمز
حشره کیمی صوتی قالاجاق گوش زماندا
ای مرثیه محتاجی! سلیم ئولمیوب ئولمز
یاز دفتر باورده «بشیر»ا٬ اوخوسونلار
ای شیعه! دئنن: حاجی سلیم ئولمیوب ئولمز
- پنج شنبه
- 19
- فروردین
- 1400
- ساعت
- 12:3
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه