عمر بن سعد:
قوتاردی جنگ عاشورا، بیز اولدوق فاتح دعوا
بو های و هوده ای لشکر، ائدون بیر مجلسی برپا
کلون طبّال‌لر یکسر،چالون سیز طبل پیروزی
ائدون شادی که پیروزی، اولوبدور بیزلره روزی
گلون کُتّاب سیز بیربیر، یازون هر اتفاقاتی
هاموز طوماره ثبت ایلون، بو ساعاتی بو اوقاتی
بلافاصله:
سوال:
الا ای جیش شیطانی، گزارش ایلیون آنی
دیون بیربیر شهیدانی کیم ئولدوردی کیم ئولدوردی؟
جواب (جمع):
امیرا آگه آنی، یزیدین گلدی فرمانی
اودور بیربیر شهیدانی، من ئولدوردوم من ئولدوردوم
سوال:
غلام ترکی کیم ییخدی، حسینون قلبینی سیخدی
ائله قاریّ قرآنی، کیم ئولدوردی کیم ئولدوردی؟
جواب:
غلام ترکی من ییخدیم، حسینون قلبینی سیخدیم
ائله قاریّ قرآنی من ئولدوردوم من ئولدوردوم
سوال:
زهیر اُول مرد میدانی، بریر اُول یار خوبانی
حبیب اُول پیر دانانی کیم ئولدوردی کیم ئولدوردی؟
جواب:
زهیر اُول مرد میدانی، بریر اُول یار خوبانی
حبیب اُول پیر دانانی من ئولدوردوم من ئولدوردوم
سوال:
او مسلم آدلی آزاده، او آذربایجان‌زاده
عزیز آذرستانی، کیم ئولدوردی کیم ئولدوردی؟
جواب:
آدیم مسلم اوزوم ملعون، او مسلم عوسجه اوغلون
عزیز آذرستانی من ئولدوردوم من ئولدوردوم
سوال:
سیزون تک یوخدی بیر جانی، هاموزسوز زاده‌ی زانی
دیون حرّ پشیمانی کیم ئولدوردی کیم ئولدوردی؟
جواب:
امیرا ای جفا کانی، چکوب بیر تیغ برّانی
بیل اُول حرّ پشیمانی من ئولدوردوم من ئولدوردوم
سوال:
الینه کیم آلوب خنجر، ووروبدور اکبره نشتر
دیون اُول شبه طاهانی کیم ئولدوردی کیم ئولدوردی؟
جواب:
آلون ایندی اله کاغذ، آدیم مُرّه، آتام منقذ
یازون اُول شبه طاهانی من ئولدوردوم من ئولدوردوم
سوال:
گل باغ حسن قاسم، اون اوچ یاشدا ئولن قاسم
او سرو باغ زهرانی کیم ئولدوردی کیم ئولدوردی؟
جواب:
او قاسم ماه‌پاره‌یدی، وجودی غرق یاره‌یدی
او سرو باغ زهرانی من ئولدوردوم من ئولدوردوم
سوال:
ائشیتدیم زینب نالان، ایکی اوغلون ائدوب قربان
او بیر جوت نازلی طفلانی کیم ئولدوردی کیم ئولدوردی؟
جواب:
منم شمر جفاگستر،که ائتدیم زینبی مضطر
او بیر جوت نازلی طفلانی من ئولدوردوم من ئولدوردوم
سوال:
دوشوب قولاّری عباسین، دوتوب زهرا اونون یاسین
فرات اوستونده سقانی کیم ئولدوردی کیم ئولدوردی؟
جواب:
حکیم بن طفیلم من، سالوب هم قولابرین همده
فرات اوستونده سقانی من ئولدوردوم من ئولدوردوم
سوال:
گولو طوبی بوداقینده، حسینون غملی چاعینده
او ششماهه لب‌عطشانی کیم ئولدوردی کیم ئولدوردی؟
جواب:
منم من حرمله ای جان، آتوب اوچ شعبه‌لی پیکان
او ششماهه لب‌عطشانی من ئولدوردوم من ئولدوردوم
سوال:
ووروب کیم اون ایکی ضربت،کسوب باشین تاپوب جرئت
دیون شاه شهیدانی کیم ئولدوردی کیم ئولدوردی؟
جواب:
منم من شمر ذی الجوشن، او نوعی که بویوردون سن
یازون شاه شهیدانی من ئولدوردوم من ئولدوردوم
سوال:
کیم اولدی بیر خزان اسدی، حسینون ال‌لرین کسدی
گل باغ تولاّنی کیم ئولدوردی کیم ئولدوردی؟
جواب:
منم من ساربان اسدیم، حسینون ال‌لرین کسدیم
گل باغ تولاّنی من ئولدوردوم من ئولدوردوم
سوال:
کسوب کیم بارماقین مضطر، آپارسین بلکه انگشتر
عزیز شاه مردانی کیم ئولدوردی کیم ئولدوردی؟
جواب:
امیرا بجدلم بجدل، که کسیدیم بارماقین اوّل
عزیز شاه مردانی من ئولدوردوم من ئولدوردوم
سوال:
ووروب کیم نیزیه باشین، وئروم من ایندی پاداشین
او خورشید دل آرانی کیم ئولدوردی کیم ئولدوردی؟
جواب:
منم شمر ستم‌گستر، که ائتدیم نیزیه زیور
او خورشید دل آرانی من ئولدوردوم من ئولدوردوم
*عمربن سعد:
سیزون تک یوخدی پیس امّت، که حیدر اوغلون ئولدوردوز
جفائیله چکوب خنجر، پیمبر اوغلون ئولدوردوز
داخی ختم ایلیون بسدی، گلستانه خزان اسدی
گزارش‌لر صونا چاتدی مصیبت باغریمی کسدی
بیزه هر قدری دنیا وار، فلک‌لر لعنت ایلرلر
بشیریله اولوب همدم ملک‌لر لعنت ایلرلر
* لازم به ذکر است که این بخش تعزیه در مجلس عبیداله بن زیاد و یزید نیز خوانده می‌شود.
- جمعه
- 20
- فروردین
- 1400
- ساعت
- 22:58
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه