مشاميمه يتشور عطر يار جمعه گونو
اودور کی قلبيم اولور بيقرار جمعه گونو
حديث واردی عبادتدی انتظار فرج
ثمر وئرور شجر انتظار جمعه گونو
يئنه گوزوم سريير بلمورم ندير سرّی
ولی ديولله گلور بير نگار جمعه گونو
ياتاندا جمعه نين آخشامی خوش يوخو گورورم
معبّر آختارورام دُرّوار جمعه گونو
ئورکلرين چولو تبديل اولار گولوستانه
تلطّف ايله سه پروردگار جمعه گونو
آدی گلنده گل نرگسین، طراوته باخ
اولور ديل اهلينه مثل بهار جمعه گونو
بئله خيال ائديرم گوللر ايچره خلق ائليوب
او نرگسين گولونو کردگار جمعه گونو
سحر چاغی اونا خاطير بنفشه لر آچيلير
گونش باتاندا او گوللر سولار جمعه گونو
ظهور مرکبينين شيحه سی قولاقه گلور
گلر او وارث دلدل‌سوار جمعه گونو
ايکی بؤله آرادان عمرو مثلی دجّالی
غلافيدن چيخاجاق ذوالفقار جمعه گونو
فقط ظهوره گوره گون لره اؤلوب سيد
نچون آچار گل هفت و چهار جمعه گونو
او گونکی گيزلين اولوب گوزلرين قاباغيندن
اينانمشام اولاجاق آشکار جمعه گونو
قناری لر اوخويولّار گوروش ترانه سنی
دعای عهد اوخورام بی شمار جمعه گونو
غزال تک منی قيلسا قوناق بير باخيشا
ئوره کدن ايله يرم افتخار جمعه گونو
سه شنبه لر گئدورم جمکرانه ياری گؤرم
يقين اولور گلور اول تکسوار جمعه گونو
دعای ندبه نی گوزياشيميله ايسلاديرام
ايکی گوزوم چون اولور اشکبار جمعه گونو
چيخانداگون ديرم بس ظهور ائدوب مهدی
اودور اولور ديليم امّيدوار جمعه گونو
يواش يواش ائله کی گون باتور ئورک سيخيلور
يواش يواش اولورام دلفکار جمعه گونو
او آخرينجی گونو گوز لين لره يازدی
«بشير» بو غزلی يادگار جمعه گونو
- جمعه
- 20
- فروردین
- 1400
- ساعت
- 22:59
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه