قویوب یاران بو دنیایه قدم صاحب زمان گلدی
ورون مژده گونه آیه فروغ کهکشان گلدی
گَلَن یولارینه اولسون آتام قربان آنام قربان
که سالسین باشلارا سایه امام انس و جان گلدی
بو گون بیر عرش ساقیندن گوزل قندیل آسلاندی
اونین نور جمالیندن بوتون دنیا ایشقلاندی
سؤال ایتدیم اَسَن یل دن ددی دهره سلیمان دی
اونا قالیچه گلمیشدی بونا تخت روان گلدی
اوتورموش نوریدن تخت روان تخت زر اوستونده
قویولموش تختی بیر آشقین گل و برگ تر اوستونده
ملکلر حوریلر آچمش اونین بال و پر اوستونده
یره قصد ریارتلن عموم عرشیان گلدی
اونین خلقت کتابینده ازلدن ثبت اولوب آدی
ایدوب خلاق او مولانی بشر اقوامینه هادی
زمان و عصره تا روز قیامت میر و مولادی
حقیقت جانب حق دن بیزه پای ارمغان گلدی
او شاهنشاهیدن بیرگون سفارش وردی پیغمبر
بویوردی اون بیر اولادیم اولار دنیالره سرور
او آخرده گلن میر خلایق جدینه بنزر
دیون گَل یا رسول الله بویورموشدون همان گلدی
چکور خجلت تماشایه چخاندا آی جمالیندن
قالور جن و ملک حیران اونین حُسن کمالیندن
فقط یللر اوپور لعل لبیندن قاره خالیندن
گورورسن یل اسنده هر یورولموش جسمه جان گلدی
او بیر دلبردی که دللر اونی مین آیه ورمزلر
اگر دنیاچی لر ورسه کلان سرمایه ورمزلر
سیاهی زلفی مین هر بیر توکین دنیایه ورمزلر
اونی الدن ورن سوداگره چوخلی زیان گلدی
حسینین با وقار اوغلی حسینی لر طرفداری
چپاول گر لرین ضدی اولوب مستضعفان یاری
اودور ویران ایدن آخر زمان دا نسل کفاری
گلر بیر گون دیسینلر یا حسین دور قان آلان گلدی
غرض ماه امامت دور دوتوب دنیانی نوریلن
عجب گوزلر اولوب روشن دولوب باشلاردا شوریلن
قرانقلار کوچوب عالم دونوب طوره ظهوریلن
کلیم اللهی سیناده قویوبدور سرگران گلدی
گوروب نرگس گلین گللر گلستانلار صفا تاپدی
اورک ملکین محبت لر دوتوب مهر و وفا تاپدی
گلوب پیرولرین حاصل نبیر مرتضی تاپدی
هدایت پرچمی الده امیر شیعیان گلدی
اوشاخلقدان او مولانین آدین ورد ایلرم دلده
امامیم دور دیسم یاریم اولار شرعی مسائلده
آقام اوز شیعه سین قویماز قالا بیر آنی مشکلده
چاغیرسا کیم خلوصیله گورر مشکل آچان گلدی
"امینی " سن قلم الده آچورسان دفتر و دیوان
یازیرسان مدح و مرثیه ائمه شأنینه هر آن
شهید کربلادن چوخ آلوبسان دردیوه درمان
سنه اول شه دن عمرونده محبت لر کلان گلدی
- یکشنبه
- 24
- مرداد
- 1400
- ساعت
- 14:29
- نوشته شده توسط
- یوسف اکبری
ارسال دیدگاه