ای دل! دِی، سونوب شمع شب انجمن ای‌وای
پروانه‌لرین قلبین آلوبدور محن ای‌وای
غربت باعینون سولدی سارالدی گلی غمدن
گول سولسا دییر بلبل باغ و چمن ای‌وای
زهرا بالاسی، یعنی حسن زهریله ئولدی
جنتّده دییر حضرت زهرا: حسن ای‌وای
فتیان بنی هاشمی زینب چاغیروبدور
گلسینله دئسینله اوز ائوینده ئولن ای‌وای
تا گلدی حسین، گوردی حسن قبلیه یاتمیش
آغلادی دئدی: وای، غریب وطن ای‌وای
قارداش باشینی قارداش آلوبدور دیزی اوسته
یاس یاسه باتوب چون سارالوب یاسمن ای‌وای
زینب گتیروب قویدی یئره آهیله طشتی
لاله‌یله دولوب دامن دشت و دمن ای‌وای
گول پرپر اولان مثلی جگر طشته توکولدی
زینب دئدی: وای سو یئرینه زهر ایچن ای‌وای
گوزیاشین حسین توکدی، چکوب آه اورَگیندن
قارادشینه باخدی، دئدی اُول غم چکن، ای‌وای
جان اوسته حسن سسله‌دی: سن آغلاما قارداش!
ای‌وای دئمه سن، قوی دیوم آهیله من، ای‌وای
لا یومَ کیومِک، غمیوه غم چاتا هیهات
قوی من دیوم: ای جسمی قالان بی کفن ای‌وای
سن کرب‌وبلاده بویانارسان قانا قارداش
حتّی دیه‌جاقدور او زمان اهرمن:، ای‌وای
عباسی گورن وقتیده قولسوز، دیه‌جاقسان:
وای نهر فرات اوسته سوسوز جان وئرن ای‌وای
قارداشی ئولن‌لر سنون احوالیوه آغلار
بیر عمر دییر قارداشی الدن گئدن: ای‌وای
قبرون اولاجاق اهل دیله کعبه‌ی آمال
ای قانلی علم گنبدی اوسته اَسَن ای‌وای
سن‌سن شهدا سروری جانیم سنه قربان
قوی من دیوم: ای کوینگی عرشه گئدن ای‌وای
قربان وئرورم قاسمیمی اکبره قارداش
وای تازه جوان اوغلونا خلعت بیچن ای‌وای
عبداللهیم اولسون او زمان، اصغره قربان
بیر عمر ربابون دیه‌جاق: صود امن ای‌وای
دیل‌لرده اثر ایلییر اشعاری "بشیر"ین
شعرین اوخودوقجا دییر اهل سخن: ای‌وای
- شنبه
- 21
- فروردین
- 1400
- ساعت
- 18:29
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه