من بلبل گلزار حسینم نه غمیم وار
یار گل بی خار حسینم نه غمیم وار
نالایقم اما صف عشّاقه قوشولدوم
یعنی که خریدار حسینم نه غمیم وار
یوخ نسخه و دارو و اطبّایه نیازیم
بیر عمریدی بیمار حسینم نه غمیم وار
عقباده الیمدن یاپیشار ال سیز اباالفضل
دنیاده گرفتار حسینم نه غمیم وار
دنیاده حسینون غمینی شادلیقا وئرمم
شادم بونا غمخوار حسینم نه غمیم وار
گلمور بوتون اعمالیمه بیر ذرّه گمانیم
امّا چوخ امیدوار حسینم نه غمیم وار
هر مشکله دوشسَمده اباالفضل ائدر آسان
چون یار علمدار حسینم نه غمیم وار
جان اوسته اونی گورسم اولار ذکر زبانیم
محو گلِ رخسار حسینم نه غمیم وار
واردور یئری اولسا کفنیم بو قره کؤینک
من محرم اسرار حسینم نه غمیم وار
بیر عدّه شب اوّلِ قبره نگراندی
من یوخ، چون عزادار حسینم نه غمیم وار
یاد ایلیورم لبلرین ایچدیقجا سرین سو
چون تشنۀ دیدار حسینم نه غمیم وار
هر مشکله دوشسمده اباالفضل ائدر آسان
چون یار علمدار حسینم نه غمیم وار
هر بیر گئجه قلبیمده دی ششگوشه مزاری
هر بیر گئجه بیدار حسینم نه غمیم وار
فخر ایلییر عالمده هره بیر زادا، منده
فخریم بودی زوّار حسینم نه غمیم وار
من مرثیه خوانم دئمیون آدیمه عالِم
بیر راثی ایثار حسینم نه غمیم وار
یاز گوز یاشیلان صفحه‌ی رخساره «بشیر»ا!
من شاعر دربار حسینم نه غمیم وار
- یکشنبه
- 22
- فروردین
- 1400
- ساعت
- 22:6
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه