ای جدّینه حُسنونده نشان یاعلی اکبر جان یاعلی اکبر
گلدون بو جهان اولدی جنان یاعلی اکبر جان یاعلی اکبر
غیرتلی جوانلاره اولان اُسوه‌ی غیرت، الگوی فضیلت
میلادون اولوب "روز جوان" یاعلی اکبر جان یاعلی اکبر
گلزار نجابتده گوزل گولدی جمالون، وار عالی جلالون
عاشقدی سنه پیر و جوان یاعلی اکبر جان یاعلی اکبر
عالمده سنه دؤرد آنالار دوغمویاجاق تای، حیراندی سنه آی
لیلایه اولان روح و روان یاعلی اکبر جان یاعلی اکبر
گر جسمیده گئتسه آرادان، جان قالاجاقدی، جانان قالاجاقدی
ای کالبد یوسفه جان یاعلی اکبر جان یاعلی اکبر
عطرونله معطّردی بیزیم محفل شادی، چون بزم ولادی
یوخدور بئله بیر عطرفشان یاعلی اکبر جان یاعلی اکبر
آچدی گئنه باغ ابدیّتده قیزیل گول، گلدی دیله بولبول
وصلی ائلیور شرح و بیان یاعلی اکبر جان یاعلی اکبر
ای فقه‌ده، ای علم‌ده، ای حلم‌ده دریا، یوخدور سنه همتا
شهزاده‌ی شاه دو جهان یاعلی اکبر جان یاعلی اکبر
جنّت سنه مشتاقیدی سن کرب‌وبلایه، اوخشور یوزون آیه
آیدا سنه عاشقدی اینان یاعلی اکبر جان یاعلی اکبر
یئتمیش ایکی عاشق قوتاروب عشق نمازین، هم راز و نیازین
اوندا کی اوزون وئردون اذان یاعلی اکبر جان یاعلی اکبر
مایلدی گریزه قلم و دفتر و شاعر، بلکه اولا زائر
ششگوشه مزاره بو زمان یاعلی اکبر جان یاعلی اکبر
گول جسمیوی صدپاره ائدوب خارلر ایوای، لایلای سنه لایلای
هئچ وئرمدی دشمن‌لر امان یاعلی اکبر جان یاعلی اکبر
باشون یاریلوب اوندا کی شقّ القمر اولدی، بیلمم نلر اولدی
اولموشدون ایاقدان باشا قان یاعلی اکبر جان یاعلی اکبر
لذّتلی آغیزلاردا اگر شعری بشیرین، شیرینیدی شیرین
لطفوندن اولوب طبعی روان یاعلی اکبر جان یاعلی اکبر
- یکشنبه
- 22
- فروردین
- 1400
- ساعت
- 22:12
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه