دولوب چون حقّیلن پیمانه و پیغامِ شاعرلر
او دور کی تلخ ائدوبدی کامِ ظلمی جامِ شاعرلر
دَریلمز دنیوی ساعاتیدن عرفانی مضمونلار
الهی لحظه لردن کسب اولار الهامِ شاعرلر
بهشته یول آچار، امّید پایلار، خلقی قورخوتماز
او دور زیبادی هر اسلامیدن اسلامِ شاعرلر
گوزلّیکدی گوزلّیکدی تماماً رسم و آدابی
محبتدی محبتدی بوتون احکامِ شاعرلر
تفکر ائتمگه وادار ائدورلر فکرِ انسانی
هزار افسوس بو آمال اولوب، آلامِ شاعرلر
او دم کی رختخوابین ساحلینده لَم وئرور چوخلار
گزور طوفان دالیجاق روحِ نا آرامِ شاعرلر
ئولوب یاددان چیخار "گردن کلفت"و "تاجر" و"قاضی"
حکومت ایلیر تاریخه اما نامِ شاعرلر !!! ...
"وفا"چیرمان قدم قوی آسمانی ایستیورسن گر
اوجا بیر نردباندی چوبۀ اعدامِ شاعرلر
- چهارشنبه
- 25
- فروردین
- 1400
- ساعت
- 15:38
- نوشته شده توسط
- یوسف اکبری
- شاعر:
-
وفا منافی اردبیلی
ارسال دیدگاه