فاطمه دلبندی عطشان جان ویرور
جانین اوز جانانینه قربان ویریر
ظلم او چولده سیل تک باشدان آشور
بو غمه یکسر - ملائک - آغلاشور
پاره‌پاره پیکری دوشموش یره
دوره‌سین اعدا آلوب چون دایره
آز قالور - یر - گوی - قاریشسون بیربیره
کربلایه صف چکوب حورا - گلور
باش آچوب صدیقه کبرا - گلور
قتلگاهه سالدی اوخدان جانماز
قانیله غسل ایلیوب قیلسون نماز
ایلسون معبودیلن راز و نیاز
قانلی لبلر - ترپنور - قان داشلانور
دورت طرفدن اوخلانور هم داشلانور
ای خدا سن شاهد اول بو حالیمه
آغلوری اهل حرم - احوالیمه
سن اوزون یار اول منیم اطفالیمه
من سنون عشقونده قانه باتمیشام
قیزلارین فکرین باشیمدان آتمیشام
من سنون عشقونده جاندان گچمیشم
اگنیمه رخت بلانی بیچمیشم
چون ازل جام شهادت ایچمیشم
باشه ویرم من بوگون پیمانیمی
دینه قربان ایلرم اوز جانیمی
من بوگون گیچدیم جلال و جاهیدن
گوز گتوردوم یکسر آل اللهیدن
قوی اوجالسین ناله - خیمه‌گاهیدن
ویرمرم باش ناله و غوغالره
سندن اوتری دوزموشم ایذالره
اولمارام عاشق اگر اوخلانماسام
بیربیله غم نارینه اودلانماسام
چاتمارام کامه - سوسوزدان یانماسام
بو سویی جمله فراموش ایلرم
جام وصلون عاقبت نوش ایلرم
نیلورم امدادیمه حورا - گله
انبیالر صف چکوب یکجا - گله
یوخ هراسیم شمر بی‌پروا - گله
اگمرم باش ذلّته - آزادیم
دین یولوندا باش ویرم - آمادیم
"اکرمی" یازما داخی ویر فیصله
ایسته بو شعره - آقا ویرسون صله
جان ویرنده باشیوون اوسته گله
آند ویر زهرایه اول عالی جناب
تا سنی اوز نوکری ایتسون حساب
- سه شنبه
- 31
- فروردین
- 1400
- ساعت
- 18:8
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه