شمرین او زمان مقصدی یا رب اله گلدی
شاه ئولدی سوسوز عالم‌آرا - زلزله گلدی
خیمه تالاسون خولی گلوب حرمله گلدی
زینب الی باشینده قاچوب مقتله گلدی
بیر قتلگهه بیر گویه باخدی دیله گلدی
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
اود ووردی عدو خیمه‌لره یکسره یاندی
بو ظلمودن آهیم شرری عرشه دایاندی
قیزلار داغیلوب چوللره قلبیم نگراندی
بو دشتی رقیّم تانیمور - رحم ایت آماندی
آخر بو خطرلی چولون اطرافی تیکاندی
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
غرّا - سسی افلاکه سپاهین اوجالاندی
بو هلهله‌دن رشته‌ی صبریم پارالاندی
وحشتندن حسین قیزلارینون صبری جالاندی
گوشواره‌سی تازه گلینون گیتدی تالاندی
سسلور کمک ایت عمّه قولاقیم یارالاندی
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
نه گونده سالوب فرصت اله شمر ستمکار
اکبر کیمی قتله یتیشوب تازه جوانلار
یوخ بیر کمکیم رحم ایله ای قادر قهّار
ایوای منه اوت ایچره قالوب عابد بیمار
قیزلار چاغیرور داده گل ای قولسوز علمدار
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
ای کاش گله شیر خدا - داده بو ساعت
گورسون نجه اولادینه ایلوله - اهانت
آلُ اللهه برپا ایلیوب شمر قیامت
اولماز بابا محشرده بو غوغا - بو علامت
هنگامه‌دی - محشردی - قیامتدی نه غارت
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
جان ویردی حسین اول وطن آواره‌سی یا رب
مقتلده قالوب پیکر صد پاره‌سی یا رب
تاراج اولونور عترت مهپاره‌سی یا رب
سسلندی ربابین ندی بس چاره‌سی یا رب
یاندی بالامین خرداجا گهواره‌سی یا رب
"الله بو یانان خیمه‌لرین صاحبی هاردا"
"زینب قالوب آواره علی نائبی هاردا"
- سه شنبه
- 31
- فروردین
- 1400
- ساعت
- 18:20
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه