مرکب اوستن تا یخلدی حجت رحمان یره
قویدی آننین سجدیه اول شاه مظلومان یره
تا دوشوب آتدان یره اول فخر اولاد خلیل
جوشه گلدی جنت اعلاده نهر سلسبیل
تتردی ارکان عرش حضرت رب الجلیل
نازل اولدی حاملان عرش جاویدان یره
موجه گلدی بحر غم طوفان ائدیبدور اول زمان
هول و وحشتدن اوجالدی ناله کروبیان
گوئیا غرق اولدی جمله فرشیان و عرشیان
کشتی دین سندی یا رب گلدی کشتیبان یره
دوشدی توپراقه عزیز حضرت ختمی مآب
جنت ایچره قلب زهرانی ائدوب بو غم کباب
گوئیا جبریل ائدیبدور عرشیدن فرشه شتاب
شهپرین آچدی او پیک حضرت سبحان یره
قانلی جسمین سینه سی اوسته آلوب روح الامین
جمع اولوبدور صاق صولوندا انبیا و مرسلین
خنجر الده ناگهان گوردی گلور شمر لعین
گوزیاشین توکدی مثال بارش نیسان یره
بسکه دوتموشدی گوزون قان ، باخمادی پیغمبره
چکمه سیله بیر تکان وئردی عزیز حیدره
شاه مظلومانی دوندردی یوزی اوسته یره
عدنیدن زهرانی گتدی دیده سی گریان یره
خنجر فولادی چکدی یرلر ائتدی زلزله
بو عملدن سالدی افلاکه بیر آیری ولوله
ظلمیله تندن آیردی ، باشینی آلدی اله
توکدی ثاراللهی اول خونخوار و بی ایمان یره
نیزیه ووردی حسینون باشینی اول بی حیا
ایلدی بو غمده زهرانین ایشین داد و نوا
ایلمه یارب اونی قعر جهنمدن جدا
سالدی بو ایشدن او ظالم آتش سوزان یره
دفتره اود ووردی خامه ، یازما « شیدا » مطلبی
آغلا بو غمده حسینه هرزمان روز و شبی
بیرده اولسا حاجتون صدقیله سسله زینبی
قوخما قویماز نوکرون دوشسون سوزی ، بیرآن یره
- جمعه
- 8
- مرداد
- 1400
- ساعت
- 11:42
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه