بو بی‌کفن یاتانلارا - کربلا سلام اولسون
سوسوز قانا باتانلارا - کربلا سلام اولسون
دوباره کربلا سنه - میهمان گلوب زینب
یورولموشام بو اوزاق یولی - خسته جان گلوب زینب
حسینه اربعین دوتا - باغریقان گلوب زینب
بو بی‌کفن یاتانلارا - کربلا سلام اولسون
گتورموشم قبری اوستونه - نازنین بالالاری
نجه گور اکبر و قاسمین - آغلاشور آنالاری
دی بیر گوروم حسینیمون - توختیوب یارالاری
بو بی‌کفن یاتانلارا - کربلا سلام اولسون
دی بیر گوروم کربلا منه - عون و جعفریم هاردا
بولنمیرم دفن اولوب نجه - یار و یاوریم هاردا
رباب آغلور سسلور منیم - نازلی اصغریم هاردا
بو بی‌کفن یاتانلارا - کربلا سلام اولسون
سلام اولا او گلشنه - جمله گوللری سولدی
سلام اولا خیمه گاهیوه - اود توتوب تالان اولدی
سلام اولا قتلگاهیوه - لخته قانیله دولدی
بو بی‌کفن یاتانلارا - کربلا سلام اولسون
سلام اولا نهر علقمه - سیل تک چوله آخدی
عطش اودوندا یاندیروب - خردا قیزلاری یاخدی
ئولنده تشنه قارداشیم - یاندی هی سووا باخدی
بو بی‌کفن یاتانلارا - کربلا سلام‌اولسون
سلام‌اولا بو تلّه که - بوردا عالمی یاخدیم
یوخیدی چاره قلبیمه - تیر محنتی تاخدیم
حسینیمی ئولدورنده شمر - من بو تلّیدن باخدیم
بو بی‌کفن یاتانلارا - کربلا سلام اولسون
سلام او شاهه عمرونه - صرصر جفا اسدی
ئولنجه آغلاسام اگر - بو مصیبته بسدی
سلام اولا او الّلره - ساربان گیجه کسدی
بو بی‌کفن یاتانلارا - کربلا سلام‌اولسون
سلام او شاهه ظلمیله - قتلگهده اوخلاندی
سویوب عدو آت دولاندیروب - پیکری ایاقلاندی
سلام اولا او لبلره - ایچمدی سو اودلاندی
بو بی‌کفن یاتانلارا - کربلا سلام اولسون
سلام او شاهه ئولن زمان - قاتلینده آغلاتدی
سلام او جسمه توپراقی - قانی آخدی ایسلاندی
سلام‌او باشه قویدولار - کولّلر اوستونه یاتدی
بو بی‌کفن یاتانلارا - کربلا سلام اولسون
قسم ویرور "اکرمی" سنی - ای خدا ابوالفضله
بیر اربعین میهمان ایله - مه‌لقا ابوالفضله
سلام اولا بو جوانلاردان - باوفا ابوالفضله
بو بی‌کفن یاتانلارا - کربلا سلام‌اولسون
- سه شنبه
- 31
- فروردین
- 1400
- ساعت
- 18:51
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه