آز قالدی کربلایه یته کاروان غم
زینب اورکلنوب دیدی تزتز آتون قدم
عطر حسینی آلجاق او غم غصّه مونسی
گوز یاشی گل عذارینه جاری اولوب او دم
قارداشینون گورنده او ششگوشه قبرینی
گلدی فغان و نالیه اول فاطمه شیم
یتدی قویوب سولان یوزونی قبرین اوستونه
ایتدی سرشگ چشمیله قبر حسینی - نم
گاهی باسوبدی جان کیمی آغوشه آغلادی
گه ایگلیوبدی گل کیمی - گه ئوپدی دمبدم
سسلردی قبریوه آنام اوغلی باجون فدا
دور گور نجه اگوب بلیمی بار درد و غم
باشیم آغاردی، لاله کیمی باغریم اولدی قان
چکدیم زمانه‌دن آنام اوغلی ز بس ستم
بو چول همان او چولدی که جور و جفائیله
ئولدوردولر سوسوز سنی اول فرقه‌ی ظلم
بو چولده غارت ایتدیلر اهل و عیالیوی
اود ووردولار آلیشدی جفا نارینه خیم
ایندی عجب صفالی اولوب دشت کربلا
واردور یری بو قبری ئوپوب منده شوط ایدم
بوردان گیدنده قویمادی شمر ستم شعار
عریان قالان جنازه‌وی دفن ایلیوب گیدم
شامیله کوفه‌نی دولانوب، اربعینیوه
گلدیم فسرده حالیله ای شاه محتشم
اولدوم حسین بو مدّتی غم غصه یورقونی
گلدیم مزارون اوسته آنام اوغلی دینجلم
ئولسون باجون نقدری دوتوب توز مزاریوی
سیلّم غبار قبریوی ای سرور اُمَم
اوغلی ئولن آنالاری دور پیشواز ایله
دور گور نجه دوتوبدی چولی ناله‌ی حرم
شاماتیدن گتورموشم اهل و عیالیوی
اولموش اورکلری غم ایّامیدن ورم
لیلا نواسی قلبیدن آرام و تاب آلور
پائین پاده اگلشوب آغلور او محترم
بیکس ربابه ویر آلا آغوشه اصغرین
چوخ ایستورم دیور بالاما لایلای دیم
دور قیزلارین قالانلارینون گویلون آل حسین
شاماتیده چکوبدوله چوخ طعنه و ستم
چکدیم نلر بو مدّتی آل امیّه‌دن
عفو ایت خجالتم آنام اوغلی رقیّه‌دن
از بس ایدردی ناله و افغان خرابده
گل تک سارالدی قلبی اولوب قان خرابده
آخدی سولان عذارینه گوز یاشی آغلادی
پربسته قوش تک اولدی نواخوان خرابده
صیّاد روزگار یانان قلبین ایلدی
تیر غم و بلائیله شانشان خرابده
بوینون قویاردی چیگنینه دلدن چکردی آه
آهی ایدردی عالمی لرزان خرابده
یاده سالاندا او بیر گیجه‌نی یانام آغلارام
اولدی همان گیجه اورگیم قان خرابده
نصف شبیدی گلدی یارالی باشون قوناق
قارداش قیامت اولدی نمایان خرابده
گورجاق طبقده قانلی باشون گلدی شیونه
قیزلار ایدوبدی چاک گریبان خرابده
آغوشه آلدی لبلریوی ئوپدی آغلادی
بیر آیدی محشر اولدی حسین جان خرابده
تنگ‌اولدی سینه باتدی نفس یومدی گوزلرین
چوخ حسرتیله ویردی قیزون جان خرابده
صبحه کیمی من آغلامیشام آغلیوب رباب
برپا اولوندی شام غریبان - خرابده
نه قبرکن تاپولدی نه تابوت و نه کفن
ایتدیم او گنج عصمتی پنهان خرابده
یوز قویسا "اکرمی" آقا قبر رقیّیه
آلّام اورکده دردیمه درمان خرابده
- چهارشنبه
- 1
- اردیبهشت
- 1400
- ساعت
- 12:39
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه