من بو گون یا رب بو جاندان گیچمیشم قرآن قالا
باش یزیده اگمرم تا دین جاویدان قالا
من حسینم پای‌بندم ایتدیقیم پیمانیمه
باخمارام اعدا وورور اوخ دسته دسته جانیمه
ایستیرم عالم بوله باتدیم سوسوز القانیمه
قویمادیم تاریخلرده نام بوسفیان قالا
ایستدی اسلامه چکسون ظلم الی نقش عدم
قویدوم عشقیله فنا فی الله مقامینده قدم
کربلاده پیکر اسلامه ویردیم تازه دم
دینی تکلیفیمدی هرگز قویمارام نقصان قالا
من سنون عشقونده آتدیم روضه‌ی پیغمبری
خوشلادیم بیر بیله ساعت بیله قانلی بستری
قویموشام هجریمده آغلار اهل‌بیت حیدری
قوی هامی اهل و عیالیم دیده‌سی گریان قالا
سن بوگون هر نه قضایه راضی اولسان راضیم
خیمه‌گاهه وورسالار اوت - قوم عدوان راضیم
پیکریم سرتاسر اولسا - زخم پیکان راضیم
توپراق اوسته اوچ گیجه گوندوز و یا عریان قالا
وعده ویرمیشدیم بو گون شهد شهادت نوش ایدم
ساکنان عرشی یکسر عشقیمه مدهوش ایدم
قانیمیله نار ظلم و ذلّتی خاموش ایدم
تا چراغ مکتب آزادگی سوزان قالا
نیلورم قان آغلوری اهل سماء الان منه
نیلورم مخیمده قیزلاریم ایدور افغان منه
هاردادی گلسون سو ویرسون خنجر برّان منه
باشیمی کسسون - داماردا قویماسون تا قان قالا
قطره قطره قوی بو قان آخسون خدا روی زمین
سیل اولوب امواجی دولدورسون حسینون مدفنین
بولسون عالم کی بو قان اولدی فدای راه دین
من ئولوب گیتدیم بو گون - قوی دین قالا قرآن قالا
شمریلن زینب منی بو حالدا ای کاش گورمسین
قتلگهده جسمیمه دشمن وورور داش گورمسین
بیربیله عالم خدا هیچ باجی قاردا گورمسین
وار یری عمرونجه زینب حالیمه نالان قالا
صبر ویر سن زینبه بو درده طاقت ایلسون
هر بلا گلسه دایانسون استقامت ایلسون
زینبیم مندن صورا تکمیل نهضت ایلسون
نیلرم بو قانلی نهضتده اگر نقصان قالا
آز قالور باشه یتیشسون عهد و پیمانیم منیم
شمر کسسون باشیمی راحت اولا جانیم‌منیم
خیمه‌گاهی آز قالور یاندیرسون عدوانیم منیم
قیزلاریم یکسر تالانسون چولده سرگردان قالا
"اکرمی" یازما داخی ویر سوزلریوه خاتمه
یازما غارت نوحه‌سین اوت سالما قلب عالمه
اجریوی ویرسون قیامتده عزیز فاطمه
اول چتین ساعتده قویماز گوزلرون گریان قالا
یازدیقون اشعاریوی تصحیح ایدنده "گلشنی"
عارف و استادیدور ارشاد ایدر حتماً سنی
سنده سعی ایله سوزوندن چیخما یاز دوز نوحه‌نی
محشره توشه الونده یاخجی بیر دیوان قالا
- چهارشنبه
- 1
- اردیبهشت
- 1400
- ساعت
- 12:48
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه