احسن احسن یوخ حسین عشقونده نقصانون حسین
باشیوی تز، ویر یتیشسون باشه پیمانون سنون
باخما آغلور قیزلارون مخیمده ایلور شور و شین
باخما بانگ وا حسینله دولوبدور عالمین
قتلیوه خنجر چکوبدور شمر و خولی یا حسین
کشمکش ایلولله باشون اوسته عدوانون سنون
گیچ باشوندان سن حسینیم قوی وورولسون نیزیه
باخما ظلم شمریدن یر گوی گلنده لرزیه
مجتبی - زهرا - علی - طاها - دوتوبدور تعزیه
عرشیده گل گور اولوب کیملر نواخوانون - سنون
باخما قوملار اوسته دوشموش جمله یار و یاورون
گون قاباقینده قالوب جسم علی اکبرون
یا دوشوب قولسوز فرات اوسته امیر لشگرون
یا ایچوب قان سو یرینه طفل عطشانون سنون
قوی بو گون اوز بولدوقون ایتسون سنه قوم ظُلم
ویرمسونله سو سنه - یانسین دوداقین ایتمه غم
حشریده ویرّم عوض اوز ذاتیمه اولسون قسم
قابل اجرادی هر نه اولسا فرمانون سنون
چوخ گتورمه سو سوزون قانلی دوداقلاردان دله
چوخ دیمه یا شمر اُسقونی - حبیبیم صبر ایله
گل بهشته هر نقدری میل ایدورسن میل ایله
گل بهشته گور نجه وار آب حیوانون سنون
من اوزوم بولّم نجه غملر پوزوب احوالیوی
زینبون سن فکرین ایتمه پوزما پوزقون حالیوی
باخما غارت ایلر اهل کینه بو اطفالیوی
باغلانار زنجیر ظلمه خردا طفلانون سنون
سن منه تاپشور حسین اهل و عیالاتون تمام
قوی نقدری اینجیدیر - اینجیتسون آخر اهل شام
حشریده آللام اوزوم اوز قدرتیمله انتقام
تا اله گلسون مرام قلب سوزانون سنون
اولما چوخ دلتنگ ظلم بو گروه ناکسه
باخما اوخلار یا قلجلار گویده ویرمیش سس سسه
قوی گلوب شمر ستمگر باشیوی عطشان کسه
قتلگاهه چشمه چشمه آخسون القانون سنون
ببربیله ظلمه شکایت ایلسنده یوخ سوزوم
سویگولوم عاشقده لازمدور ولی اولسون دوزوم
باشیوه تاج شفاعت حشریده قویّام اوزوم
اوصیادن ایلرم برتر اوگون شانون سنون
چوخ دیمه یا ربّ و یا قدّوس چکمه بیله آه
هر قدر محشرده اولسا اهل عصیان و گناه
سن باغیشلا - سن گناهین گیچ - سن اول یار و پناه
حشریده گسترده‌دی - چون خوان احسانون سنون
"اکرمی" کلب در لطف و پناهوندور سنون
بوشلاماز مین بیر امیدیله دوتوبدور دامنون
قسمت ایت بو هیئته ششگوشه زیبا مدفنون
ئولممیش گورسونله بیرده صحن و ایوانون سنون
اهل هیئت چون جواندی جمله با احساسیدی
اوردا عاشقلر همیشه مست عطر یاسیدی
پرچم هیئت به نام حضرت عبّاسیدی
دائماً اوردا اولالار - تعزیه‌خوانون سنون
- چهارشنبه
- 1
- اردیبهشت
- 1400
- ساعت
- 12:51
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه