آغلاما بو قدری گوز یاشین توکمه گل عذاره اوغول علی
باغلیوبدی اعدا سویون یولون یوخ الیمده چاره اوغول علی
باشیوی منیم سینم اوسته قوی ای عزیز جان یوخلا اصغریم
سن ربابیدن آلما بو قدر طاقت و توان یوخلا اصغریم
نه سینمده واردی صودوم گلور نه سویا گمان یوخلا اصغریم
سینمه بیله وورما درناقون - ایلمه اشاره اوغول علی
ساکت ایتماقا من سنی اورک داغلارام اگر چاره تاپماسام
آغلادوقجا منده سنون کیمی آغلارام اگر چاره تاپماسام
اللریوی بند قماطیوه - باغلارام اگر چاره تاپماسام
چالما ال ایاق رحم قیل من زار و دلفکاره اوغول علی
سن کیمی هامی خردا قیزلارون خیمه‌لرده چوخ اضطرابی وار
اود دوتوب وجودون یانور سنون گویلوون ز بس التهابی وار
تشنه‌دور آنان سوزش عطش یاندیروبدی قلب کبابی وار
هامّیا عطش ایلیوب اثر ایله بیر نظاره اوغول علی
بو عطش اودی بیر اود اولدی که هامّونین اوغول دوتدی دامنین
سولدوروب گلستان حیدرین گُل لاله‌سین همی سوسنین
مشگ صاحبین ایندی خیمده بالالار آلوب دوره‌سین یقین
الده بوش سو جامین آلوب گلور جمله آه و زاره اوغول علی
گورورم که چوخ سوزش عطش سنی سالدی طاقت و تابیدن
کاش اولیدی سیراب ایدم سنی دیده‌دن آخان اشگ نابیدن
هم سنی همی اوزومی داخی قورتارام اوغول اضطرابیدن
نیلسون آنان دردیوه سنون یوخ الینده چاره اوغول علی
نه دل آچموسان تا اورک سوزون دوشونم بالا منِ خونجگر
نه واروندی طاقت و نه قرار یاتاسان قوجاقیمده مختصر
وورماقونلا دیرناقلاریوی سن سینمه بلورسن کی صود گلر
سینمی سوزوم یوخدی وورگلان ایله پاره‌پاره اوغول علی
آغلاشور عطشدن خیامیده بالا قیزلار اوچگوندی های های
ولی وورمور هیچ بیری سن کیمی آنانین سینه سینه چنگ و نای
گوزلریوی سن یوم حزین حزین من دیوم سنه گنه لایلای
سینمی ایدوم سحره کیمی سنه گاهواره اوغول علی
دستِ لشگر غصّه‌دن داخی کاروان صبریم منیم کوچور
نُه سمایه آهیم بو دشتیده پر آچوبدی قوشلار کیمی اوچور
بو گیجه سریّه اوز اوغلونا - لیلی اکبره آغ کفن بیچور
اولمیا سحر ایستوسن آنان سالا باشه قاره اوغول علی
"اکرمی" بو دنیاده پربها گنج یوخ سنه آبرو کیمی
دست محنت و غصّه سیندیروب قلبیوی سنون بیر سبو کیمی
هر نقدری یازسان یازانماسان "گلشنی" کیمی "عدل‌جو" کیمی
آغلاما بو قدری گوزون یاشین توکمه گل‌عذاره اوغول علی
- چهارشنبه
- 1
- اردیبهشت
- 1400
- ساعت
- 12:53
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه