دوره‌می آلوب عدوان - داده گل حسین قارداش
ییخدیلار منی آتدان - داده گل حسین قارداش
قوللاریم دوشوب تندن - چاک چاک اولوب اعضا
یوخ یارالی جسمیمده - ذرّه طاقت و یارا
قانلی باشیمی کسسون - کشمکش ایدور اعدا
دوشموشم داخی جاندان - داده گل حسین قارداش
آهیمین اودی سالمیش - اود بو قلب ایجاده
نوکریوی جان اوسته - لطف ایله سال یاده
گل آماندی گل باشیم - دوشدی دست جلّاده
قانه اولموشام غلطان - داده گل حسین قارداش
مشگیم اوخلانوب گوزدن - توکرم یوزه قانیاش
یوخدی بیر نفر یانسون - حالیمه منیم قارداش
قالمیشام نه احواله - بیر گلوب گوریدون کاش
جسم و جان سنه قربان - داده گل حسین قارداش
اود دوتوب یانور قلبیم - آتش فراقینده
نوکریوه گل یار اول - سن بو غملی چاقینده
ایستیرم‌منیم باشیم - کسیله قاباقینده
ای شهنشه خوبان - داده گل حسین قارداش
گوزلریم قالوب یولدا - ای شهنشه عالم
اشقیا ایدور طعنه - عرشه اوج ایدور نالم
عرصه‌گاهه هیجاده - شاهباز بی‌بالم
قان آخور یارالاردان - داده گل حسین قارداش
نوفل ایتدیقی ظلمه - چشم روزگار آغلار
حالیمه وجودیمده - قانلی یارالار آغلار
بولسه دوشموشم قولسوز - تشنه بالالار آغلار
خجلم بالالاردان - داده گل حسین قارداش
اوخ کی دگدی مشگیمدن - جام صبر حسین داشدی
غم و غصّه دریاسی - اوندا اوستومه آشدی
حالینه بالالارین - مشگ منله آغلاشدی
یاندیم ایلدیم افغان - داده گل حسین قارداش
اوج ایدور یانان دیلدن - نُه سمایه آهیم گل
دوشموشم یامان درده - ای امیدگاهیم‌گل
بی‌پناه و بی‌یارم - هارداسان پناهیم گل
ئولدورور منی عدوان - داده گل حسین قارداش
محنت و الم‌جامی - هی بوشالدی هی دولدی
بلورم سوسوز قیزلار - ایندی گول کیمی سولدی
قوللاریم‌منه قارداش - یار نیمه راه اولدی
پیکریم اولوب شانشان - داده گل حسین قارداش
خیمدن باشیم اوسته - صون نفسده سن‌گلسن
واردی عمره بیر دردیم - لطف ایدوب اگر بولسن
ئولمه‌میش آنام جانی - گوزومون قانین سیلسین
ویرّم اوندا جان آسان - داده گل حسین قارداش
"اکرمی" بو احوالی - دفتر غمه یازدی
حشره‌جک ایده ناله - آغلاسا گنه آزدی
قبریوی گوره حسرت - سینه‌سینده قالمازدی
قیل اوزون‌اونا احسان - داده گل حسین قارداش
- چهارشنبه
- 1
- اردیبهشت
- 1400
- ساعت
- 13:5
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه