شکایتیم وار آنام اوغلی درد غربتدن
سالوبدی زینبی آخر نفسده طاقتدن
نیی بهانه ایدوب انتقام آلور مندن
ندن فلک بو قدر دویموری اذیتدن
او گونده نیکه گوز آچدیم غم و بلا گوردوم
اورک بو مدتی اودلاندی نار محنتدن
سنیله الّلی بش ایلّلیق بو عمرومی قارداش
بلی بلایه دیدوم یاندیم هر مصیبتدن
اسیر عشقون اولوب گزدیم هر دیاری حسین
سینیق کجاوه ده ایتدیم دفاع شریعتدن
وورولدی بوینوما زنجیر عشق اینجیمدیم
چوخ اینجیدیم ولی یوللارداکی شماتتدن
نقدری اینجیمیش اولسام یولوندا عشقیم وار
یولونی سالک آییرماز ره طریقتدن
بلیمی بار غم اگدی ولیک سینمامیشام
هله ده دوشممیشم اعتبار و قدرتدن
بو صون نفس گنه ده مین یزیدی خوار ایدرم
بنی امیّه نی سالّلام جلال و شوکتدن
جهاندا زاده مرجانیه بولوندورم
که دوشمز آل علی هیچ زماندا قیمتدن
نقدری کربوبلائیله واردی نام حسین
سیلینمز عالم اوزی نام زینبیّتدن
الیمده بیر یارا وار کربلا علامتیدور
دوشنده یادیمه غرق اوللام اشگ حسرتدن
اوگون که سن یارالی ذوالجناحیدن دوشدون
اوگون که زینبه باش اولدی مین قیامتدن
اوگون که آلدی حسین اشقیا آرایه سنی
گلن ووراردی سنی منتهای جرأتدن
او گون که کوفه لیلر چالدی طبل پیروزی
اوجالدی هلهله اعدای بی مروتدن
اوگون که شمر شقی ایتدی خنجرین عریان
یتیشدی قتلگهه آه حسین او ساعتدن
منیم الیم آنام اوغلی سنون کسیلدی باشون
قاریشدی قانیم حسین قانیوه نهایتدن
گرک ئولیدیم حسین گورمییدیم ئولمگیوی
نه اینکه جان قوتارام بیر ایله جنایتدن
اوگون کی گون باجون ئولسون سنه چتین گونودی
باشیوون اوسته منیدیم گلن محبتدن
بوگونده گل سنه قربان منه چتین گوندی
هرایه سسلنورم بو اوزاق مسافتدن
آماندی زینبی جان اوسته قویما تک قالسین
هایانداسان ئولورم دوشدوم استقامتدن
یتیشدی جان دوداقا قالدی گوزلریم یولدا
او گوز که دائمی ایسلاندی اشگ حسرتدن
او گوز که گوردی بتولین سینه سینون یاراسین
شهیده گیتدی اورکده اولان جراحتدن
او گوز که گوردی علینون قلجلانان باشین
بویاندی سجده ده اوز قانینه شقاوتدن
او گوز که گوردی جفائیله دوغرانان جگری
توکولدی طشته جگر قانی ظلم عورتدن
او گوز که گوردی علی اکبری عبا ایچره
وجودی قطعه به قطعه اولان جراحتدن
او گوز که گوردی دگوب اصغرین بوغازینه اوخ
سالوب ربابین او غنچه گولون طراوتدن
او گوز که گوردی ابوالفضلی سو کنارینده
خیامه قویمادی نعشی گله خجالتدن
او گوز که گوردی سنی شمر الینده جان ویروسن
وورولدی نیزیه قانلی باشون عداوتدن
اوگوز که گوردی یانور خیمه لر رقیه قاچور
دوشنده یاده وجودیم اسور او حالتدن
او گوز که گوردی بالا قیزلارین دویولماقین
قاچاردی آت قاباقیجه رقیه وحشتدن
او گوز حسین یومولور ایندی باغلیان یوخدی
آنام دوشوب یادیما بیر نچه مصیبتدن
اودا دیردی نه قارداش یانیمدا وار نه آنام
یاسیما کیم گله جاخ ایندی شهر غربتدن
فدا گلن یولووا باری تز گلورسن گل
ئولنده باشیمی آل سینه وه عنایتدن
وجودیمه خوش اولار سن کفن گییندیره سن
مضایقه ایلمه اولسا کهنه خلعتدن
بیزه محبتینی ( اکرمی ) ایدوب ثابت
آماندی ایلمه محروم اونی شفاعتدن
- پنج شنبه
- 2
- اردیبهشت
- 1400
- ساعت
- 14:27
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه