قرخ گوندی مرتضی ایوی ماتمسرا اولوب
قرخ گوندی زینبین ایشی آه و نوا اولوب
قرخ گوندی گول کیمی سارالوب مجتبی یوزی
اشگ غمه باتوبدی او مهر وفا یوزی
قرخ گوندی گولمیوبدی شه کربلا یوزی
اشگین یوزه توکوب سوزی ایوای آنا اولوب
قرخ گوندی زینب آهیله دنیانی داغلوری
بوش بسترینده فاطمه نین گیزلین آغلوری
گیزلینده قانلی کوینگی جان تک قوجاغلوری
سسلور منیم گونوم آنا سن سیز قرا اولوب
یاد ایلرم او گونلری بو ایوده هر زمان
رأفتله سینن اوسته ویرردون منه مکان
قویمازدون ایلسین منی غم غصه باغریقان
هجرونده ایندی گورنجه قلبیم یارا اولوب
سندنصورا آتام بو ولایتده تک قالوب
امّیدی ببر سنیدون ایله بی کمک قالوب
قلبونده بولّم ایندیده سوز فدک قالوب
حیران بو ظلم ثانیه اهل سما اولوب
بولمم نه نوعی ناقه وجدانی پیلدی
بیر مجتبی و بیرده خدا بولدی نیلدی
هر نیلدی سنه او ووران سیلی ایلدی
گوردوم ایوه گلنده قولاقون یارا اولوب
یا فاطمه فدا باشیوین ابتلاسینه
اولدون رضا مشیّت حقین قضا سینه
یاننام ولی حسین بالاوین ماجراسینه
هانسی امامه گور بیله ظلم و جفا اولوب
بیردن هوا قرالدی دوتوب کونی زلزله
قوپدی قیامت عالمی سخت اولدی مرحله
آتدان ییخوبلار اوغلووی بیر قانلی مقتله
ئولدورماقینا حاضر او شمر دغا اولوب
بیر سینه اوسته چیخدی ئوپردون همیشه سن
ویران جهانی ایتمدی الله بس ندن
زینب نه گوردولر گلور هولیله خیمدن
اللر اورک باشیندا سوزی،وا اخا اولوب
ایوای منه نه حالیده گوردی او کافری
فرمایش ایتدی ساخلا الون اولما چوخ جری
ظالم بلورسن هیچ کسوسن هانسی حنجری
جنت آناما جدّیمه بزم عزا اولوب
بسدور بو غمده « اکرمی » یاندی هامی جهان
یاندیرما تازه دن دل زهرانی سن اوتان
حتما عزیز فاطمه لطف ایلسه عیان
بیر گون یرون سن گوره سن کربلا اولوب
- یکشنبه
- 5
- اردیبهشت
- 1400
- ساعت
- 21:40
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه