سینق کونلومه هجرانونده از بس ایلرم فریاد
ندور دردیم گلوب الله رضاسی ایتموسن امداد
گوزوم یوللاردا قالماقدان عزیزیم نوریدن دوشدی
الیمدن دوت اگیلدی قامتیم ای قامتی شمشاد
بلالی باشیمه بولسن نلر گتدی بو سن‌سیزلیق
یانان قلبیم کیمی قلبون چکر هجران الیندن داد
گونی گوندن گیچور کروان کیمی عمروم بودور قورخوم
وصالون اولمیا قسمت قالان عمروم اولا برباد
گوزوم قوروخوبدی مهر و آذر و آبان و بهمندن
اشاره‌ت ایلورم دِی شاختاسیندان هر چه باداباد
اوشوتدی جانیمی اسفند آیی دوزدوم بونا خاطر
خرابه کونلومی بیرده گلرسن ایله‌سن آباد
باهاردی - ایل دونوب - بایرامدی - گلشنده آچوب گوللر
کوچوبدور قیش - گلوب بلبل - گول اوستونده اوخور آزاد
بوگون بایرامدان اون گوندی گیچور بس هارداسان تز گل
داریخدیردی منی سن‌سیز نجه گور چرخ بد‌بنیاد
من اول یعقوب کنعانم - الا یا ایّها الیوسف
سنی صید ایتدی مندن آیری سالدی رحمسیز صیّاد
هله من بوینی چیگنینده دایانّام سن گلن یولدا
صبادن کوینگون عطرون آلام بلکه اولام دلشاد
کنارونده سنون اولماق منه هر لحظه بایرامدی
اولور فروردین اولسون فرقی یوخدور یا اولور خرداد
سنه من عاشقم گوستر جمالین قویما حسرتده
سنون عشقون قوجالدان عاشقوندن ایله بیر دم یاد
الون قوی سینمه تا شاختادا - بوز باغلیان قلبی
اریتسین اللرون اعجازی گویا که اولوب مرداد
دالونجا پا پیاده چوللره قاچماق نه شیریندی
هانی مجنون گلوب گورسون منی بس هاردادی فرهاد
بیوکلردن کیچیکلر قایدادی - ایستلّله بایراملیق
اوزون احسان ایله بایراملیقوندان ایستسم هر زاد
چاتار عمروم باشا - ئوللم - مزاریم اوسته یازدیرّام
سنون هجرانون اولدی من بلاکش عاشقه جلّاد
اماندور فانی دنیادن ال اوز بل باغلاما { هاتف }
ئولر انسان گیدر دنیاده سندن تک قالار بیر آد
- یکشنبه
- 5
- اردیبهشت
- 1400
- ساعت
- 21:51
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه