هارداسان حالیم پریشان اولدی گَل
گوز یاشیم هجرونده القان اولدی گَل
شوق دیدارون آلوب مندن قرار
سسلرم جانا سنی بی‌اختیار
صبح امّیدیم دولاندی اولدی تار
باعثی ایّامِ هجران اولدی گَل
دلبرا آیا بودور رسمِ وفا
مَه جَمالون مندن ائتدون اختفا
سن‌سیز از بس روزگار ایتدی جفا
عاشقون قلبی قزل قان اولدی گَل
ای نگاریم باخ دلِ سوزانیمه
قیل نظر بو دیده‌ی گریانیمه
آیریلیق بیر اوت سالوبدور جانیمه
وار یوخوم بو اوتدا سوزان اولدی گَل
ناز ایدورسن - من نیاز اوستوندیم
سویگولوم سوز و گداز اوستوندیم
سجده حالینده نماز اوستوندیم
ورد و ذکریم آه و افغان اولدی گَل
سن‌سیز آرام و قراریم قالمادی
گیتدی الدن اختیاریم قالمادی
گلشنیم - باغیم - بهاریم قالمادی
خانه‌ی صبریمده ویران اولدی گَل
سن‌سیز عمر ائتماق منه اولدی چتین
بیرده قسمت کاش اولیدی وصلتین
"اکرمی" دائم چکردی حسرتین
آیریلیقدان ئولدی بی‌جان اولدی گَل
- یکشنبه
- 5
- اردیبهشت
- 1400
- ساعت
- 21:53
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه