بشر الهی شرارت ایدور یالان دانیشور
اوزون اسیر رذالت ایدور - یالان دانیشور
داخی اورکده سنون عشقیوه تاپیلمور - یر
او قلبی جای قساوت ایدور یالان دانیشور
حقیقت عالمینی گورماق ایستمور امّا
دوروب عناده جهالت ایدور یالان دانیشور
تعّجب عالمی شیطان باخور گورنده بشر
بو قدری ظلم و شقاوت ایدور یالان دانیشور
قویوب حراجه ساتور جمله دین و ایمانین
به ظاهر حفظ دیانت ایدور یالان دانیشور
گونوز جماعتین آذوقه‌سین ایدن انبار
نماز شب قیلا همّت ایدور یالان دانیشور
حقوق خلق مسلمانی پایمال ایلین
اداره‌لرده ریاست ایدور یالان دانیشور
دیلیندن عورت اوشاقلاری گورمز آسایش
ائشیکده خلقی نصیحت ایدور یالان دانیشور
اولوبدی رأی جماعتله هیئت امناء
عمل یرینه خیانت ایدور یالان دانیشور
او شاعری که یازور نوحه شعرینه پول آلور
حسینه قصد جسارت ایدور یالان دانیشور
محرّم اولجاقی گور - نوحه‌خوانِ امروزی
پول آلماقا نجه سبقت ایدور یالان دانیشور
عزا و لهو و لعب مجلسینده شرکت ایدن
اودا - حسینه خیانت ایدور یالان دانیشور
ریادن اوتری آچوب ال - امان مُنتَظَری
کذائی مجلسه دعوت ایدور یالان دانیشور
پزشک جامعه مسئولدی جانِ انسانه
طبابت ایتمسه غفلت ایدور یالان دانیشور
او کس که شرکتی وار - احتکار داروده
یقین که قتل و جنایت ایدور یالان دانیشور
دیور رفیق شفیقم یوزونده خوش دانیشان
دالونجا دائمی غیبت ایدور یالان دانیشور
مدام کوفه‌لی تک رنگیدن دوشور - رنگه
سیاستیله رفاقت ایدور یالان دانیشور
حرام آل ویره قرآنه آند ایچور تاجر
کلام حقّی تجارت ایدور یالان دانیشور
هر ایل مشرّف اولور حجّه حاجی بازاری
سرِ معامله رغبت ایدور یالان دانیشور
بولنمورم که نه نوعی ایدوبدی - رمیِ جَمَر
هنوز شیطانا طاعت ایدور یالان دانیشور
یقین امام زمان گلسه گورسه شیعه‌لری
خلاف حکم شریعت ایدور یالان دانیشور
دعای ندبه اوخور صبحِ جمعه- بعد از ظهر
تمام فسق و فضاحت ایدور یالان دانیشور
حقوق کارگری ویرمیندن ایله سوال
نه علّت اولدی عداوت ایدور یالان دانیشور
علی علی دیور امّا عملده - عکس‌العمل
بنی امیّیه بیعت ایدور یالان دانیشور
اونون نه چوخ گیجه‌لر اهل عیالی آج یاتیشور
بو رختخوابینی راحت ایدور یالان دانیشور
یوخ اعتقادی ئولومدن و یا قیامتدن
دئسه که ذرّه‌جه وحشت ایدور یالان دانیشور
اگر چه شیعه‌دی دلده علی محبّتی وار
و لیک بخل و حسادت ایدور یالان دانیشور
قوتار بو سوزلری چوخ یازما "اکرمی" گرچه
بیر عدّه دائمی عادت ائدور یالان دانیشور
امان بیر عدّه الیندن که شعریوی اوخیوب
گورنده طعن و شماتت ایدور یالان دانیشور
دیولّه یوخدی سوادی بیر اوزگه شاعردن
یقین که شعرینی غارت ایدور یالان دانیشور
ندور جوابی قیامتده ای خدا گوره‌سن
او که ندیده قضاوت ایدور یالان دانیشور
- سه شنبه
- 7
- اردیبهشت
- 1400
- ساعت
- 20:18
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه