اربعین شاه دینه زینب نالان گلور
کربلایه بیر بولوک عورت اوشاق گریان گلور
حضرت زین العباد اُول سرور اهل یقین
دیده سی گریان اورک قاندور امام متقین
نچه مدتدودر که اولموش غملریلن هم قرین
باشدا هشتاده یاخین نسوان آل احمدی
هاموسی غم یورقونی گلزار عفت سرمدی
سر سلامتدور هامی یوخدور داخی قوللاردا بند
فتح ایدوب شاماتی زینب رجعت ایلور سربلند
حیف اولا ویرانه ده آتدی قضا بندی کمند
قالدی عنوان سفیرآلسون رقیه شامیده
کاخ سبزه زلزله سالسون رقیه شامیده
خوشدور اشعارین یازاندا شاعر انشاد ایله سون
قوی بیزه وهابیلر هر لحظه ایراد ایله سون
شامیده قالدی خانم تا کفری بر باد ایله سون
پرچم سرخ حسینی نصب ایدوب ویرانه ده
نام پاکی اوچ پر اوخدور دیده ی بیگانه ده
منزل ویرانی الان قبله ی عشاقیدور
خورداجا قبری اونون تاج سر نه طاقیدور
تک نه شیعه، دردمندان جهان مشتاقیدور
بذل و احسان ایتماقا همچون یم موّاجیدور
بی برو برگرد ایکی عالم اونون محتاجیدور
مین قلم هرالده مین شاعر یازا اوصافینی
ثبت ایدنمز کیمسه گر منظور ایده انصافینی
لعل و جوهر ایستیور، تشخیصیده صرافینی
احتزاز نهضت سرخه ملقبدور خانم
فارق التحصیل دانشگاه زینبدور خانم
الغرض ویرانه ده دفن اولدی اسپهر اولدوزی
نام زیباسی اولان هر محفلین دادلی دوزی
شامیده قالدی حسینون ماه وش زیبا قیزی
زینبون آغلار گوزوندن جاری گوز یاش بر ملا
کاروانه مقصد اولدی کربلا دوشدی یولا
تاکه استنشاق ایدوبلر کربلانون عطرینی
منظره یا که ایدوبلر گوزده شاهون قبرینی
هر کسن لبریز ایدوبدور دیلده جام صبرینی
ناقه دن قوندی یره پروانگان بو تراب
بارش نیسان اولوب گوزیاشلاری، گوزلر سحاب
اشک باران ایلیوبلر قبرهای اطهری
اول آغوشه آلوبلار قبر شاه بی سری
آغلیوبلار آغلادوبلار عرش حیّ داوری
قویمادی عاشوریده دشمن سنه یاس ساخلیاق
گلمیشوک قبرون کنارینده دویونجان آغلیاق
کربلاده جان ویرن مظلوم قوناقه من فدا
فخرایدن زیبا مزاری نه رواقه، من فدا
آخرین دمده سوسوز عطشان دوداقه من فدا
ای قفادن راس پاکی ذبح اولان لایلای حسین
اوچ گون عریان نعشی گونلرده قالان لایلای حسین
زینب غمدیده آچدی لفظ آتش بارینی
قبرینون اوسته گلوب قیلدی مخاطب یارینی
باشلادی توصیف ایده ایام محنت بارینی
زینبون جانی حسین اولسون سنه قربان دیدی
قوللاریم قارداش طنابه باغلادی عدوان دیدی
من دیدی عمریم بویی قارداش ملامت چکمیشم
کوفه و شام ایچره قارداش چوخ مصیبت چکمیشم
هر بلادن باش غم هجران و فرقت چکمیشم
آیریلان گوندن حسین بیر لحظه یوخ آرامشیم
ذکر تسبیحیم حسین وای، جان ابالفضدور ایشیم
سویله دی اهل حرم بیربیر سلامتدور حسین
آچ گوزون باخ گور نه عالم نه قیامتدور حسین
یوخ رقیم زینبون سندن خجالتدور حسین
شامیده ویرانه ده دفن ایتدوم اول مه پاره سین
تحفه دور گتدیم الیمده خورداجا گوشواره سین
کوفیه وارد اولاندا ناظریدیم باشیوه
داش ویروبلار قان آخوب ممزوج اولوب گوزیاشیوه
سس ویر آی باشسیز بدن قربان یارالی باشیوه
نهضتون حفظ ایلیوب عزّو شرف کسب ایتمیشم
قلب اردوی عدوده پرچمین نصب ایتموشم
گرچه سنسیز قالماقا بو دهریدن سیرم حسین
فکر ایدور اعدا ئولوب قارداشلاریم پیرم حسین
ثابت ایتدوم من علینون دختری شیرم حسین
گردن گردنکشانی دهریده سیندیرمیشام
شهر شامه پرچم نصرمن الله ویرمیشام
ظلمت شب کیم یول آختارسا اونون فانوسیم
دخت طاهانون قیزی زهرا سیر ناموسیم
چپ باخانماز کیم بیزه من غیرت اقیانوسیم
شهر شامه نطقمیله زلزله سالدیم حسین
اللره دوشموشدی قانلی کوینگون آلدیم حسین
قلب آل حیدری قان ایله دی بیر منظره
خیزرانی اندیرن وقته او ظالم لبلره
اولدی محشر اوردا بر پا بیرده آل حیدره
نسکیلیدی جسمیوی گوردوک یوخیدی اللرن
خیزران اندوقجه قارداش پارچالاندی لبلرون
عزمیمی جزم ایله دوم من سید بطحا کیمین
یا علی دیلده قیام ایتدوم آنام زهرا کیمین
یوز دولاندیردوم یزیده غیضیلن سقا کیمین
گوز تیکوب اهل جفا گورّم سنون پاداشیوه
اذنیم اولسا قصریوی الان چویرّم باشیوه
آند اولا معراجه عزم ایتموش بابام پیغمبره
آند اولا عصمت گولی زهرای پام و اطهره
آند اولا سقای طفلانه کسیلموش اللره
دورمارام ساکت جهانه ولوله ساللام یزید
هر نقدری قان به نا حق توکموسوز آللام یزید
حیف اولا دست قضا تقدیریلن با هم اولوب
خون دل گوز کاسه سینده اشکیله مدغم اولوب
قامتیم چوگانه دونموش ظلم الیندن خم اولوب
ایلرم قبرون کنارینده روان گوز یاشیمی
گل باشیم اوسته ئولن گون سر فراز ایت باشیمی
- چهارشنبه
- 8
- اردیبهشت
- 1400
- ساعت
- 17:9
- نوشته شده توسط
- یوسف اکبری
- شاعر:
-
کربلایی فخرالدین اسکندری
ارسال دیدگاه