عاشقم قرآنه من محكم دي عشقيم پايه سي
قانلي زلفومدور منيم بو عشقيمون پيرايه سي
زينبم قارداشيمون صاحب لواي عشقيم
پيرو خط امام جان فداي عشقيم
كشتي طوفان عشقون ناخداي عشقيم
غرق ائدنمز زينبي موج ائلسه درياي عشق
واردي باشيمده حسينيم تك منيم سوداي عشق
يدي قارداشيم ئولوبدي افتخاريمدي منيم
اسلحه م الله اكبر حق ياريمدور منيم
خاتم پيغمبران جد كباريمدور منيم
قويمارام قالسون يزيدي كاخ استبداديده
من اوني محكوم قيلام دادگاه داديده
بير زمان گوردوم حسينيم هي دونور صاقدان صولا
قارداشيم باشسيز يوزي اوسته دوشوبدور توپراقا
شمر ظالم دستماز آلدي نمازين قيلماقا
رو بقبله دوردي يانينده او قانلي خنجري
ايليوب تكرار قلبينده خداي اكبري
من حسين قانين خضاب ائتديم آغارميش زلفيمه
بير بئله همت جهاندا قسمت اولماز هر كيمه
دين و قرآن اوسته هركيم ئولسه اتمز واهمه
كاخ ظلمي محو ائدر بو چكديگيم آهيم منيم
قورخمارام طاغوتيدن شاهددي اللهيم منيم
زينبم زهرا شيم بيماريمون بيماريم
كاروان كربلانون كاروان سالاريم
هم نشينم ليلي زاره ربابون ياريم
ناقه لر آتدوقجا پا آواز ائدر بانك جرس
عشق حجاجي صداي زنگيدن ايلر هوس
خاك راه عشق گويا كيميادن قوزانور
آسمانه ير يوزيندن هي صدادور قوزانور
تيره شبده گوگلره نور خدادور قوزانور
فاطمه موساسي بو صحراني كوه طور ائدوب
ناقه اوستونده گزن بلبلري پرشور ائدوب
قافله حاصل گئچوب دروازه ساعاتيدن
اوج ائده نور خدا مردم چيخا ظلماتيدن
مردمي پرشور ائده پرشور تبليغاتيدن
گورديلر سر نيزه ده بير باش گوزل قرآن اوخور
آغ محاسيندن آخار توپراقه قرمز قان ، اوخور
ذكر ائدر لحن حجازيلن او باش كهف آيه سين
شامون اهلي بير كسوك باشدان آلور قرآن سسين
سنگ باران ائتدي دشمن فاطمه ريحانه سين
شامون اهلي شاد اولوب ال چالديلار كام آلديلار
نيزه باشينده كسيلميش باشي ديلدن سالديلار
قارداشيم ديلدن دوشوب محملده من گلديم دله
واي حسينيم واي دئديم آغلاشدي مندن قافله
سد راه اولدي گئدن دوردي باخوبلار محمله
يوخلاميشدي هوليلن دوردي رقيم آغلادي
واي بابا واي سويلدي قلب جهاني داغلادي
من دئديم : نازلي بالامسان بولموسن بلوا ندور
او دئدي : عمه بو ال چالماق بو واويلا ندور
ئولدي دعوا ائلينلر ايندي بو دعوا ندور
آغلاما آغلورسان عمه گوزلريندن ياش آخور
چك ئوزون بير گوشيه محملده دشمنلر باخور
من دئديم : عباسم آغلار غيرتي چوخدور اونون
او دئدي: من گورمديم ديلر قولي يوخدور اونون
من دئديم : باشدان اياقه پيكري اوخدور اونون
من دئديم : ايندي اباالفضليم آلار زينب سسين
او دئدي : عمه خجالتدي چاغيرما بيلمه سين
من دئديم : كه چاره يوخدور داش آتوللار قيزلارا
او دئدي : قول باغليسان عمه باشوندا وار يارا
من دئديم : سن زلفووي ناخن عشقيلن دارا
هر قدر ظلم ائتمگه مايلدي دشمن باشلاسون
ناقه اوسته خيرداجا قيزلاري قيزلار داشلاسون
من دئديم : بو شامون اهلي ظلميني آرتيرماسون
خورداجا قيزلاريمون نخل حياتين قيرماسون
قيزلاري قيزلار ويرور باري بويوك لر ويرماسون
بوندان آرتيق بو آتاسيز قيزلاري آغلاتماسون
ناقه اوستوندن يره گه ناقه اوسته آتماسون
من دئديم : نازلي رقيم سن مجاهدسن قيزيم
شامون اهليهر قدر ظلم ائتسه شاهدسن قيزيم
اهل تقواسان اوشاقسان خيردا زاهدسن قيزيم
غم يمه عمون سنه قربان اسير عشق سن
اي حسينيم دن نماينده ، سفير عشق سن
بو قدر من آغلامازديم آغلادور قيزلار مني
سسليوللر ناقه اوستونده آدامسيزلار مني
يانديروللار هر باخاندا آي سيز اولدوزلار مني
آي جدا باشينده يورقون يوللانور شرمنده دور
باخميور هيچ بير يانا فكر و خيالي سنده دور
شامه من امر اماميله جهاده گلميشم
راه عشقي سير ائدوب گاهي پياده گلميشم
گورمگه قارداشيمي طشت طلاده گلميشم
محو ائدوب عيش يزيدي كاخيني بر باد ائدم
سعي ائدم شام و سحر ويرانه ني آباد ائدم
- شنبه
- 11
- اردیبهشت
- 1400
- ساعت
- 20:48
- نوشته شده توسط
- یوسف اکبری
- شاعر:
-
مرحوم نخستین اردبیلی
ارسال دیدگاه