محرّم اوْلدۇ، ائیله‌یین نوا حسینه

ادبله ساخلایێن بۇ آی عزا حسینه

جزاکم‌ الله

 

اۆره‌کلره بۇ آی، غم-ی-غوبار اله‌ندی

مساجید اوْلدۇ غمکده قارا بزه‌ندی

پیمبر اوْغلۇنۇن عزاسی تازه‌له‌ندی

گلین بۇ مجلیسه ائدین بُکا حسینه

جزاکم‌ الله

 

گله‌نده هر زامان بۇ مجلیس-ی-عزایه

یازێن عریضه اشگیله‌ن اوْ مُقتدایه

نظر سالێن اۆره‌ک گؤزیله کربلایه

سلام ائدین ذبیح-ی-من قفا حسینه

جزاکم‌ الله

 

اوْ حضرته بۇ آیدا، چوْخ ستم‌لر اوْلدۇ

خزانه گتدی باغ-وْ-بوستانی سوْلدۇ

غمیله غۆصصه ایله جام-ی-قلبی دوْلدۇ

صدا وئرین غریب-ی-نئینوا حسینه

جزاکم‌ الله

 

عزا دۇتان زاماندا، تئشنه لب حسینه

صفا وئرین سرشگ-ی-نابیله دوعئینه

حضور-ی-دل تاپێن ایمام-ی-مشرقینه

چوْخ آغلایێن امیر-ی-ماسوا حسینه

جزاکم‌ الله

 

بیلین کی فیض-ی-معنوی بُکاده واردێ

حسینه آغلاماقدا ایستیفاده واردێ

سرشگ-ی-چشمه اجر-ی-فوق‌العاده واردێ

نثار ائدین سرشگ-ی-پُربها حسینه

جزاکم‌ الله

 

بۇ آی فقط نه شیعه‌لر حسینه آغلار

سماده بیل فرشته‌لر حسینه آغلار

و هاکذا غریبه‌لر حسینه آغلار

بئجادی سیزده آغلاسوْز آقا حسینه

جزاکم‌ الله

 

حسینه هر نه آغلاسوْز روادێ والله

بۇ گؤز یاشۇز یارسێنا دوادێ والله

حسین اؤزۆ سفینة‌النّجادی والله

دخیل اوْلۇن سفینة‌النّجا حسینه

جزاکم‌ الله

 

بۇ آی حسینه روز-وْ-شب پیمبر آغلار

علیّ-ی-مُرتضیٰ اوْلار مکدّر آغلار

قابێرغاسێ سێنان بتول-ی-اطهر آغلار

دییه‌رله هر کیم ائیله‌سه بُکا حسینه

جزاکم‌ الله

شاعر: موغانلی امین کاظیمی