ولی حضرت حق شاه لا فتا حیدر
وجوداقدسی سرتابه پا صفا حیدر
گوزلدی نام دل آراسی ساقی کوثر
شهنشه دوسرا شافع جزا حیدر
شجاعت عالمی یوخ کیمسه مثل ومانندی
همیشه فاتح وپیروز هر غزا حیدر
قلم لیاقتی یوخ طبعیمون نظام ایتسون
مقام ومنزلتی اوج ایدوب هارا حیدر
فقط بوواژه نی یازدیم مثال شانیندن
اولوبدی عالم آرا مایه ی بقا حیدر
نه تک بوعالمه بلکه جنان ورضوانه
ویروبدی نور رخی زینت وجلا حیدر
غرض که دهریده هم کفو اولوبدی زهرایه
یازیلدی پاک آدی داماد مصطفا حیدر
ابوتراب و اَبَ الزّینب اِبنِ بو طالب
اباالحسندی اَبِ شاه کربلا حیدر
بویوردی لَحمُکَ لَحمی جناب پیغمبر
وهم دَمی دَمُک ای دیده مه ضیا حیدر
جهان اگراولا تمثیلیده صدف مثلی
وجود اطیبی چون در پربها حیدر
اوکس که بیت خداده گلوبدی دنیایه
دگول بجزشه مردان واوصیاحیدر
یاز ای قلم شب معراج خاتم مرسل
خوش آمدعرض ایلیوب زینت سما حیدر
تمام عرض وسما فخر ایدولله مولایه
اولوبدی رتبه ده بوفخریچون سزاحیدر
اجازه ویرسه علی گون چیخوب طلوع ایلر
اجازه سیله ایدر عالمه عطا حیدر
مُغَصِّب اولدی اوشه غاصبان اعرابه
گوروب اوقومیدن عالمده صدجفا حیدر
زبعدختم نبی توش اولوبدی آلامه
ئولونجه اولمادی آلامیدن رها حیدر
ازل ثقیفه ده حقین چکوبله یغمایه
اولوب ایگیرمی بش ایل ساکن سراحیدر
ویروبلار اوددربیت امامت اودلاندی
گوروبدی فاطمه سین درده مبتلا حیدر
اوباغبان ئورگین قان ایدوبدیلراوباش
دوتوبدی فرقت زهراسینه عزا حیدر
گجیله دفن ایلیوب دلبرین غم آماجی
بالالاریلان ایدوب صبحه تک نوا حیدر
سالوبدی درده اونی زینبینون آغلاماقی
محالیدور تاپیلا دردینه دوا حیدر
حسن حسین یوزه گوز یاشین ایلیور جاری
دونوبدی قامتی چوگانه مرتضاحیدر
دییردی آغلامیون صبر ایدون سیزه قربان
اگر چه غمدن اولوب قامتی دوتا حیدر
علی ولی خدا شحنه ی نجف یارب
قان آغلیاردی ئوزی لیک در خفاحیدر
دیزین قوجاخلیوب آغلاردی عالمه سرور
دییردی فاطمه اولسون،سنه فدا حیدر
مثال گول سنون عمرون آز اولدی عالمده
جهاندا قالماقا سنسیز دگول رضا حیدر
دولاندی چرخ زمانه کیچوبدی چوخ ایللر
یتوب حکومته چون دست بر قضا حیدر
بش ایل یازولار اولوب حاکم اهل اسلامه
گوروبدی قوم دغادن نه چوخ جفا حیدر
یتوبدی آتمیش اوچه عمرینون گوزل یازی
بوفانی دهره بلی ویرمیوب بها حیدر
یازیلمیاندی سجایاسی دفتره سیغماز
ایدوب خدایه گوره عالمی رها حیدر
قویوبدی عالم حیرتده مین سلیمانی
جنانه مالک اولا ایله دی اِبا حیدر
دییردی حیدره جنت لقای یزداندی
اولاردی نیمه ی شب غرق در صلا حیدر
همین بو اصله گوره زینبون اورک بندی
یتیشدی وصله نماز اوسته هکذا حیدر
رسا ندائیله سسلندی گوگده جبرائیل
بویاندی قانه گلون تاج اِنَّما حیدر
جنانداباشه قراسالدی دخت پیغمبر
قلیجلانوب دیدی باشدان غم آشنا حیدر
شهادته یتیشوب پادشاه انسیله جان
به ضرب تیغ همان اَشقَ الاَشقیا حیدر
بفوری عازم اولوب مسجده حسین وحسن
گوروبله باشدا الی باشدا وار یاراحیدر
غرض به نحوی علی حمل اولوبدی منزلینه
دوشوبدی بستره اول شمس وَالضّحا حیدر
بالالار آلدیلا دورین مثال پروانه
وجودی شمع کیمین ناره مبتلا حیدر
اوحربه ئیکه باشین یاردی زهرداریدی
اولوبدی باعث ایده ترک اقربا حیدر
گوزون یوماندا علی زینب ال آتوب باشه
دییردی گوزلرون آچ یاتما دورآتا حیدر
آناسیزام منی قویما آتاسیز عالمده
آماندی اولما رضا تاسالام قرا حیدر
حسینی تاپشور اباالفضل باوفایه بابا
قان آغلیور نجه گور میر نینوا حیدر
سالوبدی باشینه سبط النبی عزا شالین
روان ایدور یوزه گوز یاشی مجتبا حیدر
جهانی جان جهان آتدی برملا گوزدن
اولوبدی زیب جنان شاه هل اتی حیدر
بوغمده سنده حسینیله آغلا مولایه
جزاده شافع اولا بلکه (ثاقبا) حیدر
- شنبه
- 18
- اردیبهشت
- 1400
- ساعت
- 15:10
- نوشته شده توسط
- یوسف اکبری
- شاعر:
-
کربلایی فخرالدین اسکندری
ارسال دیدگاه