درباره خبر ویردی نگهبان خرابه
جان ویردی گلون بلبل خوشخوان خرابه
زینب ئوزین ئولدوردی قالوب یرده جنازه
یکسر پوزولوب جمع پریشان خرابه
غساله اگر گئج گله قالماز بیری سالم
وحشتدن هلاک اولدی بو طفلان خرابه
القصه یزیدی او گجه ایلدی بد خواب
آه دل مظلومه زندان خرابه
گوردی که اگر صبح آچیلا ظلمی اولارفاش
امر ایتدی گجه دفن اولا سلطان خرابه
غساله گلینجه ولی,صبح غم آچیلدی
تنگ اولدی,تماشاچیه میدان خرابه
زینب گوتوروب اللری اوسته او بالانی
غسالیه ویردی مه ایوان خرابه
بیر سوز دیدی اما هامی ال باشنه آتدی
ایسلاندی نم اشگیله دامان خرابه
غساله سنی الله بونی آهسته سویوندور
گر اینجسه لرزان اولار ارکان خرابه
پیراهنی آهسته چخارتدی بدنیندن
بلدی دوشه جک دللره دستان خرابه
چکدی گنه ئوز کوینگینی جسمنون اوسته
تا گورمیه گل جسمینی طفلان خرابه
بیردن اگلوب ئوپدی یوزین دوردی یول آلدی
کسدی قاباقین غمزده نسوان خرابه
سسلندیلر اولما بیزی فقر ایچره گورورسن
مأیوس ایلمز صاحب احسان خرابه
تپراقه نظر سالسا اگر سید سجاد
سرتاسر اولار لعل بدخشان خرابه
غساله آچوب ئوز یاخاسین گلدی فغانه
بیر قاره عزا پیرهنی ویردی نشانه
عرض ایتدی خانملار من ئوزوم یار حسینم
گزلنجه نه مدتدی عزادار حسینیم
هر چند یزیده بله بیر سوز دیمک اولماز
اللرده ئولوب بو بالا غسل ایلمک اولماز
زینب باخوب اعضاسنه نیلی یرین ئوپدی
یوزدن آیروب زلفنی سیلی یرین ئوپدی
قبرین قازوب ئوز کوینگینه بوکدی بالانی
قبره قوبوب آهسته بلند اولدی فغانی
سعی ایلدی هر چند که تسلیم اولا صبره
اما اوره گی گلمدی تپراق توکه قبره
فوج اسرار بیر, بیرینه ایتدی اشاره
هیچ کیم بیر اووج توکمدی تپراق اومزاره
سسلندی قرا یللر ایدون دردیمه چاره
تپراق سووروم باشه توکون سیز بو مزاره
- یکشنبه
- 19
- اردیبهشت
- 1400
- ساعت
- 19:15
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه