اللی دورت ایل غم غم اوستن گلدی عُلیا زینبه
غم دئمه، معشوق ادیردور عشقی انشاء زینبه
بذل اِدیبدور، شأنِ لایَحصی، خدای لامکان
صبرِ کبری، فهمِ والا، نطقِ غَرّا زینبه
فی المثل، کرب و بلاده عرشیان قالموشدولار
عالم لاهوتیده، غرق تماشا زینبه
دوزدی ظاهرده سینیخمیشدور، یورولموشدور خانیم
هی ووروردی طعنه اوستن طعنه، اعدا زینبه...
هی باسیردی باغرینا، سوسو وران اولدوزلاری
جان وئریردی خسته جانلار چولده؛ گویا زینبه
حقّی وار، ام المصائب آدلانا زهرا قیزی
حقی وار احسن دییه معناده زهرا زینبه
کیمدی زینب؛ فارغ التحصیل دانشگاه عشق
مدرکین شاه نجف ایلوبدی امضاء زینبه
ولوله سالدی تمام شهره دخت بوتراب
اونداکی اِتدی مدد؛ اول نطق گویا زینیه
سس دوشوبدی شامده دینجلدی غملر خسته سی
اتمدی بیر گون وفا بو دارِ دنیا زینبه
گون قاباغینده قالیب غمنن آغاردی زلفولر
پیک حتمیِ اجل وئردی تسلا زینبه
نه سرین سو ایچدی، نه دینجلدی راحت سایه ده
آغلادی احوالینه معناده بابا زینبه
هارداسان قارداش دئدی گل گوزلریم باغلا حسین
باشیمی آل دیزلرین ئوسته بیر آز آغلا حسین
من سنین عشقینده چون چولدن چوله توشدوم حسین
عالمه قارداش باجی عشقین بیلیندیردیم حسین
اکبره باخدیم؛پوزولموش حالیوه یاندیم حسین
خیردا قیزلار خیمه ده یاندی، من اودلاندیم حسین
وای ربانین حالینه،وای اصغره، وای زینبه
قتلگاه ایچره توشن بیر پیکره، وای زینبه
- دوشنبه
- 20
- اردیبهشت
- 1400
- ساعت
- 19:31
- نوشته شده توسط
- یوسف اکبری
- شاعر:
-
ابراهیم قبله آرباطان
ارسال دیدگاه