اوزور ال یار یاریندن ولی آهسته آهسته
گئچیر دار و نداریندن ولی آهسته آهسته
او دلخسته نگاریندن ولی آهسته آهسته
پیمبر یادگاریندن ولی آهسته آهسته
توکور یاش، گول عذاریندن ولی آهسته آهسته
دییر زهرا ! علی نی آتش هجرانه یاندیرما
منی هجرونده باغستانلاری زهرا دولاندیرما
او گیزلین قبرین ئوسته اشکیمی قانه بویاندیرما
آدامسیز قالموشام، دلخسته یم، دلخسته یم، خسته
اوزور ال یار یاریندن ولی آهسته آهسته
منه سندن سورا دونیاده هر یئر بیت الاحزان دی
زمانی که وروب اوت ثانی ملعون قاپیم یاندی
در و دیوار و مسماریله آهین عرشه قوزاندی
منی قان آغلادیر بو صحنه لر همواره پیوسته
اوزور ال یار یاریندن ولی آهسته آهسته
سنه سیلی دیندن چوخلارین دیندیرمیرم زهرا
مدینه اهلینه بیز نیله میشدوخ، بیلمیرم زهرا
هئله گون گورمیوبسن، یاتما دور، ایله کرم زهرا
سنه سیلی ووروبلار آگهم زهرا ، علی ئوسته
اوزور ال یار یاریندن ولی آهسته آهسته
اولان اولدی؛ یوموبدی گوزلرین گون گورمین زهرا
ولایت حقی ئوسته کوچه ده سیلی یین زهرا
در و دیوار و مسمارین فشاریندن ئولن زهرا
یوموبدور گوزلرین زهرا، غمین و زار و بشکسته
اوزور ال یار یاریندن ولی آهسته آهسته
- چهارشنبه
- 22
- اردیبهشت
- 1400
- ساعت
- 15:55
- نوشته شده توسط
- یوسف اکبری
- شاعر:
-
ابراهیم قبله آرباطان
ارسال دیدگاه