ای سپه کوفه تانورسوز منی
من نوه ی شیر خدا اکبرم
ایلیون اصلانلاروزی با خبر
فاتح میدان بلا اکبرم
ای سپه کینه جو
لشگر بی آبرو
بسدی داخی گفتگو
ایستمورم ایندی سو
اولسام عمر سعدیله گر روبرو
بسدی بو
ایلر اجل آرزو
شامه کیمین گزدیررم کو به کو
اکبرم
زاده پیغمبرم
مین بو قَدَر گلسه قوشون اسمرم
نیلرم
تیغه دچار ایلرم
قلعه ی خیبر کیمی دورسوز قوشون
قلعه نی سیندیرماسام ال چکمرم
من نوه ی شیر خدا اکبرم
اصغرون آغوشه آلوبدور رباب
دل کباب
هیچ کیمه ویرمور جواب
خیمه ده طوفان ایلیوب قحط آب
بی حساب
ایندی ایدون انتخاب
یا گرک ئوز قانیمه غلطان اولام
یاکه فرات اوستونه پرچم وورام
عار اولا فرهنگوزه
دیلده کی نیرنگوزه
فکر ایلیون هنگوزه
شیر خدا اوغلی گلوب جنگوزه
اگنیمه خفت دونونی بیچمرم
پرچمیزون سایه سینه گیچمرم
آلسام اگر نهریده سو ایچمرم
آنداولا سلطان لب عطشانیمه
باغلادیقیم عهدیدن ال چکمرم
من نوه ی شیر خدا اکبرم
ای سپه کین شعار
لشگربی ننگ و عار
گلسه قوشون بی شمار
ایلیرم تار و مار
ضربتیمی گورسه دیر اهل نار
الفرار
منده علی قانی وار
خیمه ده قیزلار چکوری انتظار
اشکبار
ایندی گرک قان سالام
تا قالام
تشنه زلیخالریمه سو آلام
ویرسه اجازه منه یالقوز امام
یک کلام
ایلیرم لشگروزی قتل و عام
والسلام
نور دل حضرت پیغمبرم
من نوه ی شیر خدا اکبرم
آند اولا فتاح در خیبره
حیدره
پادشه محشره
شاه ملک منظره
خلق ایدرم بوردا گوزل منظره
چاتسا الیم شمر جفا گستره
کافره
کافر بد اختره
باشینی قربان کسرم اصغره .......
- شنبه
- 25
- اردیبهشت
- 1400
- ساعت
- 21:33
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه