بهار عشقون عجب باصفادی یا زینب
صفالی منظره سی جانفزادی یا زینب
سنون مقدّس آدوندا رموز خلقت وار
اودور بو آد بیزه مشکل گشادی یا زینب
طبیب درد زمانسان ، نجیب دامانون
دوا گزنلره دارالشّفادی یا زینب
وجودون ام ابیهایه اَلمُثنّادی
دئسم اگر سنه زهرا ، بجادی یا زینب
او عطریکی نفسوندن نفس نفس اوجالار
منیم عقیده مه عطر خدادی یا زینب
سنون یوزونده کی نور ، آفتاب نوری دگل
او نور ، نورِ رخِ انبیادی یا زینب
منیم جانیمدا نه ارزش فدای عشقون اولا
سنه زمین و زمان جانفدادی یا زینب
گدای درگهون اولماق یاراشماز هر کسه چون
سنون قاپوندا ملک لر گدادی یا زینب
غلط دی کیم دئسه معجر آچیلدی باشوندن
قسم حسینه بو سوز افترادی یا زینب
نماز عصمتوه اقتدا ائدوب مریم
همان نمازیکی مهری حیادی یا زینب
کلاس صبریده ایّوبه سن وئروبسن درس
کلاس صبر او دشت بلادی یا زینب
او یر کی سینه سی اوسته سوروندی اوردا حسین
خدا بیلور سنه مروه صفادی یا زینب
بهشتی هاجره وئر ، بوشلا باغ رضوانی
سنون بهشتون او قانلی منادی یا زینب
تمام خلقه اگر کعبه قبله گاه اولسا
سنونده قبله گهون کربلادی یا زینب
قسم او لبلره کی عشق سوره سین اوخیدی
سن اولماسیدون اگر کربلادَن آد یوخیدی
نوا سنوندی خانم ، نینوا سنوندی خانم
شکوه واقعۀ کربلا سنوندی خانم
وجب وجب ، او دیاریکی پاک تپراقی
قیزیل قانیلان اولوب کیمیا سنوندی خانم
شریک نهضت سردار روی دار اولدون
بلایه لا دئمدون ، چون بلا سنوندی خانم
سالاندا شمری نفسدن منای اقدسده
باخوب گوی اهلی دیدی بو منا سنوندی خانم
بیر اللی قوزادون عباس قالخیزان علمی
ندا گلوب علم کبریا سنوندی خانم
شرفده باشدی بو پرچم عصای موسادن
هم اژدها هم عصا هم لوا سنوندی خانم
نه نوعی شرح ایلسون خامه لر جلالتوی
کی شأن و عزت بی انتها سنوندی خانم
بهار فصلی او گل کی صفا وئرر چمنه
اگر دیل آچسا دئیر بو صفا سنوندی خانم
مسیح کیمدی کی هر دمده مین دواسی اولا
اونون دمینده کی سایسیز دوا سنوندی خانم
نه ماهه واردی نیازون نه نور مهتابه
چون آفتاب طلای لقا سنوندی خانم
قسم قداست چادر نماز زهرایه
عبای عصمت آل عبا سنوندی خانم
اگر لقب وئریله بانوان دنیایه
نشان شیرزن کربلا سنوندی خانم
قدم قدم سفر غمده اوجه گئتدون سن
بو شیرزنلیگی غارتده ثابت ائتدون سن
دئدون گُل عاشقیم قویمارام گلاب یانا
دوزنمرم ، چکه بلبللریم عذاب یانا
یانان چادرلاری پروانه تک دولاننام اوزوم
پریمی ویرّام اوتا ، شمع انقلاب یانا
خزانه صاحبی مقتلده قول آلوب مندن
کی قویمیام بو بیاباندا دُرّ ناب یانا
وقاریلن دورارام خیمه لر قباقینده
او خیمه لر کی دمادم ائدر شتاب یانا
قوجاقلارام اوت ایچینده قالان ستاره لری
چکیلمرم دالا ، یاران آفتاب یانا
اگر وجودیمی باشدان ایاقه اوت بوروسه
اجازه وئرمرم عصمت یانا حجاب یانا
باشیمدا ساخلیارام قمچی آلتدا معجریمی
محالیدور کی قویام معجر و نقاب یانا
عقاب آل عبا دوزدی پرچم اوسته یاتوب
دوزنمرم ولی من پرچم عقاب یانا
بو قانلی پرچم ابالفضلیمون نشانه سیدور
منه چتیندی نشان امیر آب یانا
طناب عشقیدی بو ایپ کی باغلانوب قولوما
اودور کی قویمارام آتشده بو طناب یانا
هوانی توستی دوتوب ، ایستی کول یاغور باشیما
منیم بو حالیمه واردور یری سحاب یانا
گرک ملکلریمون سوندورم یانان اتگین
هله من ئولمه میشم آل بو تراب یانا
فقط حسین بودی قورخوم بو گیر و دار ایچره
رقیّه نین دالیسیجان قاچوب رباب یانا
غم ائتمه سن ولی ، من عشق دفترین آچارام
هایاندا قاچسا دالیجان ایاق یالین قاچارام
- سه شنبه
- 28
- اردیبهشت
- 1400
- ساعت
- 13:2
- نوشته شده توسط
- یوسف اکبری
- شاعر:
-
بهزاد قاسمی اردبیلی
ارسال دیدگاه