حافظ دین خدا منجی قرآندی حسین
پاسدار شرف مکتب عرفاندی حسین
آی علاجی کسیلن دردووه درماندی حسین
هرکسین سایه ی غم سیخسا یارالی ئورگین
گئتمسین آیری یره دوتسون حسینون اتگین
مهرباندی بئله فکر ائتمه مدارا ائلمز
فاطمه اوغلیدی سرگشته ی صحرا ائلمز
ال دوتار سائله اما اونی رسوا ائلمز
قره کوینکلره ارباب دل آرادی حسین
ساربانی الی بوش قویمیان آقادی حسین
شاهدیم واردی بو عنوانیمه ای اهل عزا
یثربی ترک ائلیوب طبق روایت گویا
مکّیه گئتدی بیر ایل حضرت شاه شهدا
یعنی هجرانی حَرَم قلبینه داغلار قویدی
دالیسیجاق باجیسی زینبی آغلار قویدی
ازدحامیدی او ایل کثرت حاجیلردن
مؤمن و مؤمنه لر گلمیشیدی هر یردن
مکه دولمیشدی او ایل امت پیغمبردن
قوشولوب مردم معمولیه شاه و ملکه
لَکَ لبیک صداسی اوجالوردی فلکه
از قضا بیر بَدَوی وحشی عرب ضمن طواف
حرمِ امنِ خداده ائلدی هتک عفاف
بیر خانم عورتین حقّینده ائدوبدور اجحاف
گوستروب آینه تک نفسینون عکس العملین
الین آتدی او حیالی خانمون دوتدی الین
بَدَوینون گتیروب عرشه تکان بد عملی
برق تک نازل اولوب خشم خدای ازلی
یاپیشوبدور الینه گوردی همان عورت الی
آیورا بیلمدی هر نه ائبدی سعی و تلاش
مکه شهرینده اولوب معجزه حاجیلره فاش
وئردیلر وضع اسفناکی اطبایه خبر
یغیشوب بیر یره شورا ائلدی اهل نظر
حاصل مجلسی حاجیلره فاش ایلدیلر
دئدیلر یوخدی گمان باد موافق اسیله
بولارین اللری لازمدی بیلکدن کسیله
ائله کی خاتمیه چاتدی اطبا سخنی
اعتراض ایلدی بیر مرد شریف مدنی
دئدی دوزدور بو عرب سهو ائلیوبدور علنی
باخسا الله ولی بو حالت شرمنده سینه
من بیلن اولسا اگر رحم ائلیر بنده سینه
ایستسوز چاروزی استاد مسیحانی تاپون
تشنه لبلر کیمی دریای خروشانی تاپون
آختارون بند دل حضرت زهرانی تاپون
مکّه زاد اوغلی سالوبدی ئوز ائوین یاده گلوب
گورمیشم مکّیه ریحانه ی زهراده گلوب
الغرض فاطمه نون اوغلی خبردار اولدی
او گرفتارلری گورمگه ناچار اولدی
کرمی جوشه گلوب مایل دیدار اولدی
مکه ده آیری زیارت اولارا اولدی نصیب
گوردیلر پای برهنه باش آچیق گلدی طبیب
باخدی بیچاره لرون رنگینه سلطان وحید
باغلانوب گوردی او مرد عربه راه امید
گورسنور آغلاماقیندان کی پشیماندی شدید
اگلشون یرده دئدی حقه توکل ائلیون
من دعا ایلیورم سیزده توسل ائلیون
رو به قبله دایانوب فخر منا و عرفه
دوزدی گوزیاشینی مژگانلارینون اوسته صفه
دئدی وئرّم اوّل سنی شاه نجفه
التماس ایلمورم جنت الاعلایه گوره
منی سیندیرما ننم حضرت زهرایه گوره
میهمانه بویوروبسان کی گرک حرمت اولا
رحم ائله ئوز قوناقوندی بو گرفتار بلا
گوز تیکوبدی الووه سائلی بوش سالما یولا
آند وئرّم سنی ئوز رحمووه امداد ایله
بولارین آچ قنادین قوش کیمی آزاد ایله
حضرتین گوزیاشی عرش اهلینه چوخ گلدی گران
معجرین آچدی خانم فاطمه بانوی جنان
دئدی آغلاتما حسینی آی حسینی یارادان
طاقتیم یوخدی توکه گوزیاشی رخساره بالام
قویما بیگانه ایچینده قالا آواره بالام
ناگهان جوشه گلوب رحمت حیّ ازلی
قویدی آلنین ائله کی تپراقا زهرا گوزلی
او گرفتارلرین گوردیلر آیریلدی الی
حاجیلر باخدی حسینون توکولن گوزیاشینا
کعبه مثلی هره بیر دفعه دولاندی باشینا
یخیلوب مقدم سلطانه او مرد بَدَوی
گوزینون یاشی یوزینده ائلدی پیشروی
دئدی ای فاطمه ریحانه سی سبط نبوی
دئمورم قوی او کرامتلی دوداقوندن ئوپوم
وئر اجازه دیورم مین یول ایاقوندن ئوپوم
حیف اولا بوشدی الیم کیسه ی سیم و زردن
ساربانم تاپورام رزقیمی صحرالردن
ایستمزلر آقالار گرچه عوض نوکردن
گوزلریم کور اولا گر لطفووی گوزدن ایتورم
کاش بیرگون گله منده الووه ال یتورم
آرزو ایلیورم ای حرمون سالاری
کاش جبران ائلینده بو گوزل ایثاری
حرموندن اولا بیر شاهد شیرین کاری
اولا فرصت سنه بیر خدمت شایان ائلیم
بالالارون باخا من لطفووی جبران ائلیم
آغلاماق وقتیدی همت ائله ای اهل عزا
مطلبیم قلبووی یاندیرسا ائله حقین ادا
گون او گون اولدی دوشوب مقتله شاه شهدا
گون باتوب دشت و بیابانه دوشوب سایه ی غم
وئردیلر باش باشا بیر خیمه ده نسوان حرم
شهدا قانلارینون عطری دولوب صحرایه
یئل اسور اکبرین عطرین آپارور لیلایه
آغلاشور گویده کی قوشلار یارالی سقایه
زینبین قلبینی نیزاره اسن یل یارالار
آغلاماقدان یورولوب یوخلادی جیران بالالار
شهدانون باشینا حضرت زهرا دولانور
اوغلی اللرده ئولوب باشینه حورا دولانور
باشینه قاره سالوب چوللری تنها دولانور
سو کنارینده ابوالفضله غمی ایلر اثر
جسمی میدانیده قوللاری نیستاندا اَسر
بیر قرالتی گورونور پنجه لری اوسته گئدور
مال دنیایه اولوب واله و دلبسته گئدور
گه قاچور قدّی خمیده گهی آهسته گئدور
بند زر عشقی دوشوب باشینه میدانی گزور
الینه خنجر آلوب شاه شهیدانی گزور
سس گلوب قانلی عبادن او زمان ال ساخلا
بیبیمه رحم ائله ای هرزه روان ال ساخلا
قوناقی وار بابامون گئتمه دایان ال ساخلا
یادووه مکه نی سال بیرده کی نفسون عملین
ننه نون گوزقاباقیندا بالانون کسمه الین
او قدر غالبیدی نفسینه عشق زر و سیم
بی حیا ساخلامادی مقتل سلطانه حریم
بی وضو داخل اولوب کعبیه ابلیس رجیم
گوردی قرآن داغیلوب مقتله شیرازه سی یوخ
او قدر داش وورولوب جسمینه اندازه سی یوخ
قول وئرمیشدی گلوب جانینی قربان ائلیه
اللریندن ئوپه بیر خدمت شایان ائلیه
مکه ده ایلدیگی لطفینی جبران ائلیه
چوخ یامان گونده گلوب لطفینی جبران ائلدی
اللرین کسدی شهون قانینه غلطان ائلدی
ائله کی خاتمه تاپدی او غم افزا عملی
حضرتین گوردی اسور تپراقین اوستونده الی
رمزی بیر سؤز اونا آندیردی حسین بن علی
یعنی غارت ائلیوب کوفه لیلر پیکریمی
گور نیازون اگر اولسا آپار انگشتریمی
- چهارشنبه
- 29
- اردیبهشت
- 1400
- ساعت
- 22:55
- نوشته شده توسط
- یوسف اکبری
- شاعر:
-
استاد حسین غفاری اردبیلی
ارسال دیدگاه