سن حسینون صودامر سربازیسان
سینه مه خاطره ی غم یازیسان
ال ایاق چالما بالا
صبریمی آلما بالا
یات لب عطشان بالا یات (۲)
برج غم اولدوزی تک باتدین علی
آتا آغوشین اوخا ساتدین علی
اوخا گولدون منی آغلاتدین علی
آرزووا چاتدین علی
نازیلن یاتدین علی
یات لب عطشان بالا یات (۲)
گولومی حرمله قئردی ولدی
اوچ پر اوخ حلقوه ووردی ولدی
آتادان اوغلون آییردی ولدی
سنی قانه بلدی
چولده جیران مله دی
یات لب عطشان بالا یات (۲)
نه بیلیدیم بئله بیر ساعت اولار
منه حسرت سنه اوخ قسمت اولار
سپرم عرشه قانین زینت اولار
مقتلین خلوت اولار
فاطمه دعوت اولار
یات لب عطشان بالا یات (۲)
وار هله حرمله نین بهتر اوخی
منه قسمت اولاجاق آخر اوخی
بوغازیندان چکرم اوچ پر اوخی
گؤرمه سین مادر اوخی
ائتمسین باور اوخی
یات لب عطشان بالا یات (۲)
الیم اوسته سنه لایلای دییرم
آناوین حالینه ایوای دییرم
زحمتی اولدی علی زای دییرم
من اوغول وای دییرم
یوخ سنه تای دییرم
یات لب عطشان بالا یات (۲)
سن اوغول گلشن غم بلبلوسن
سن رقیه بالامین سویگولوسن
محسنین یولداشی جنت گولوسن
باغ غم سنبلوسن
آغلورام سن گولوسن
یات لب عطشان بالا یات (۲)
- چهارشنبه
- 29
- اردیبهشت
- 1400
- ساعت
- 22:57
- نوشته شده توسط
- یوسف اکبری
- شاعر:
-
ابوالفضل عباسی معروفان
ارسال دیدگاه