بو کربلا قربانگه جاناندی زینب
بوردا حسینون تشنه لب قرباندی زینب
جدّیم دِیَن یردور بو یر صبر ایله گورسن
صد پاره جسمیم زینت میداندی زینب
بو یر حقیقی کعبه دور رشک منادور
اوغلانلاریم قارداشلاریم بوردا فدادور
عالَم لری آغلار قویان کرب و بلادور
بوردا آنام ، جدّیم ، آتام ، گریاندی زینب
نوحی سالان طوفانه بو صحرای غمدُور
جدیم خلیله مایۀ رنج و اَلَمدُور
بوردا منی غرق ایلین بیر قانلو یَمدُور
امّا نجه یَم ؟ قانلو بیر طوفاندی زینب
گر چه حجازه سرورم میر عراقم
دنیاده امّا قالماقا یوخدور علاقم
بو غملی چولده یدّی گون، باجی قوناقم
صبر ایله دنیاده هامی مهماندی زینب
گوردون قَدَم قویجاق بورا نه حاله قالدیم
قوندی یوزومه غم توزی، سولدوم سارالدیم
ئوز مقتلیمدن عطرینی زهرانین آلدیم
زهرا حسینه ایمدیدن نالاندی زینب
آل امیّه ایلیوب اسلامی بد نام
هند اوغلی ایستور قالماسون اسلام و احکام
من قویمارام پامال اولا احکام اسلام
جانیم بو چولده دینیمه قرباندی زینب
وار بو چوله گلماقدا بیر عالی مرامیم
ضدّ یزیده باشلانور بوردا قیامیم
کاخ یزیدی یخماقا وار اهتمامیم
بو فکره مظلومیَّتیم عنواندی زینب
باخما باشیمدا بو قشون بو احتشامه
یوز دوندروب عمریم گونی ای باجی شامه
امّا بلاسی باشیمون یئتمز تمامه
گون تک گوررسن نیزه ده رخشاندی زینب
بو یر حریم قدسدُور جای بلادور
بو دشتیده سو تک آخان ثار خدادور
هر دردمنده توپراقی خاک شفادور
هر درده قانلو تربتیم درماندی زینب
اولسا هدف عالی گَلَر غَملَر گوارا
چوخ چوخ مقدّسدور هدف ای دخت زهرا
دوغرانسا قطعه قطعه گر مرآت طاها
لیلایه مشکلدور منه آساندی زینب
وئرّم باجی بو چولده من بیر جبهه تشکیل
فاتح چخار بو عرصه دن آیات تنزیل
اولماز داخی کابینۀ اسلام تعطیل
بو جبهه حقّ و باطله میزاندی زینب
بو جبهه نین عبّاس تک سرداری واردور
حیدر کیمی شمشیر آتشباری واردور
قویسون سو اوستونده اوزون قوللاری واردور
تقدیره عالی خدمتی شایاندی زینب
بو جبهه نین دل یاندیران بیر رازی واردور
بیر، آلتی آیلیق سود اَمَر ، سربازی واردور
تبلیغ دینه چوخ بُیوک اعجازی واردور
گرچه اونا پیکان، دمِ پستاندی زینب
هر درد و محنت یوز وئره من سهل سانّام
ائتدوقجا شدت درد و غم باجی دایانّام
آخر بو چولده تشنه لب قانه بویانّام
غسلیم یارالاردان آخان آلقاندی زینب
معبودیمه سوز وئرمیشم قالوا بلاده
قالسون کفن سیز پیکریم کرب و بلاده
اولسون قوناق قانلو باشیم مطبخ سراده
مطبخ مگر شایستۀ سلطاندی زینب
بیر عمردور نوحه یازار آغلار «حسینی»
سیل سرشگین عارضه باغلار «حسینی»
قلبین شرار آهیله داغلار «حسینی»
منظوری بیر عالی صله احساندی زینب
رباعی:
خواهرا اینجا زمین کربلاست
جایگاه امتحان نینواست
قتلگاه من در ایندشت بلاست
مقتلم برتر ز عرش کبریاست
- چهارشنبه
- 29
- اردیبهشت
- 1400
- ساعت
- 23:1
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه