یاحسین درگهون با صفادی
تربتون هر مریضه شفادی
کعبه اولسا اگر باب جنت
شیعه نون جنتی کربلادی
دردمندم آقا یا حسین جان
دردیمه قیل دوا یا حسین جان
معرفت باده سی دولدی داشدی
مرغ روحیم عراقه پر آشدی
نیلورم من طبیب و دوانی
تربتون کیمیادن ده باشدی
دردمندم آقا یا حسین جان
دردیمه قیل دوا یا حسین جان
کیم دیور شیعه بی دادرسدی
تک ابالفضل هامی خلقه بسدی
حمدُ لِلَّه که اولدوم حسینچی
باد رحمت باشیم اوسته اسدی
دردمندم آقا یا حسین جان
دردیمه قیل دوا یا حسین جان
گوزلریمدن آخار گونده قان یاش
دردیمی هیچ کسه ایتمرم فاش
حاجتیم یوخدی سیم و طلایه
ئولمه میش کربلانی گورم کاش
دردمندم آقا یاحسین جان
دردیمه قیل دوا یا حسین جان
قلبیمه دولسا غم آغلارام من
آهیله سینه می داغلارام من
هر زمان درد الیندن یورولسام
اصغریوه عزا ساخلارام من
دردمندم آقا یا حسین جان
دردیمه قیل دوا یاحسین جان
شمر ظالم جفایه تلسدی
باشیوی سو کنارینده کسدی
عرشیدن سس گلوب کسمه ظالم
جان ویرر ایندی آخر نفسدی
دردمندم آقا یا حسین جان
دردیمه قیل دوا یا حسین جان
باخمادی قیزلارون ناله سینه
زینبون وای حسین وای سسینه
خنجرین قویدی عطشان بوغازه
چیخدی عرش خدا سینه سینه
دردمندم آقا یا حسین جان
دردیمه قیل دوا یا حسین جان
ای قلم سوز چاتیبدور گریزه
یاز نلر گلدی شاه عزیزه
نعشی عریان قالوب قوملاراوسته
باشینه منبر اولموشدی نیزه
دردمندم آقا یا حسین جان
دردیمه قیل دوا یا حسین جان
نیزه باشینده قرآن اوخوردی
سوره ی کهفی هرآن اوخوردی
لبلرین خیزران بولمیشیدی
پارچالانموش بوغازدان اوخوردی
دردمندم آقا یا حسین جان
دردیمه قیل دوا یا حسین جان
- سه شنبه
- 4
- خرداد
- 1400
- ساعت
- 18:2
- نوشته شده توسط
- یوسف اکبری
- شاعر:
-
مرتضی اسکندری
ارسال دیدگاه