رقیه ام غم گولونه بوداقام
قارداشسیزام ائللریمدن اوزاقام
بیلمدیلر منه طعنه وورانلار
بش اون گونلوک خرابیه قوناقام
رقیه ام نوش ایتمیشم هر غمی
غملر اولوب بو غریبین همدمی
اولماسیدی عمم چوخدان ئولموشدوم
الله منه چوخ گؤرمه سین عمه می
رقیه ام خرابه ده سفیرم
اوچ یاشیم وار یورکلره امیرم
کربلادن شامه کیمین یوللاردا
دؤیولموشم شمر الینده اسیرم
عزیزلریم کربلاده قالدیلار
قافله نی چؤلدن چوله سالدیلار
غارت گونی نامردلر الیمدن
اکبر آلان گوشواره می آلدیلار
رقیه ام چوخ ایستورم اکبری
حالیم پوزار اکبریمون غملری
بابام گئتدی قارداشیما سو آلسون
اوخلادیلار الی اوسته اصغری
محبت گؤیونون دان اولدوزیام
ائللریمون هم دادی هم دوزیام
اوچ یاشیم وار یورولموشام فلکدن
من ربابین قرا یازی قیزیام
بهار گلدی من بیر نازلی گل اولدوم
خزان اولدی کؤچری بلبل اولدوم
هجران اوتی سالدی شرر جانیما
ائله یاندیم یاواش یاواش کول اولدم
ویرانه ائو منه غم درگاهیدی
منیم بابام عالملرین شاهیدی
عمم دیور غم ایلمه ٬ ظالمین
ائوین یخان مظلوملارین آهیدی
درد و بلا دوردی منیم یولومدا
غم سان وئرور هر لحظه صاق صولومدا
بو یوللاردا منی ائله ووردیلار
ایندیده وار قمچی ردی قولومدا
غم غصه وار منیم حزین سؤزومده
دولوب یاغار غم بولودی گؤزومده
ارث آپارار هر بیر بالا ننه دن
منه چاتدی سیلی یئری ننمدن
گجه گوندوز خرابه ده آغلارام
غم اوتونا ئورگیمی داغلارام
اگر بابام الده مرهم گتوره
ایاقیمون یارالارین باغلارام
ازبر اولوب اکب آدی دیللره
بیرگون گلوب صفا وئرر ائللره
اکبر گلسه اصغریده گتورر
لایلای چالوب جان دییرم اصغره
بیر ایچیم سو آواره سین نیلیوم
خالی قالان گهواره سین نیلیوم
غریبلیقون دردی قالسین بیر یانا
هیچ بیلمورم دیل یاراسین نیلیوم
رویاده گؤردوم غم دالا قالیبدی
خرابیه یول اکبریم سالیبدی
از بس منی چوخ ایستیور اکبریم
بیرجوت منه گوشواره ده آلیبدی
- سه شنبه
- 4
- خرداد
- 1400
- ساعت
- 18:22
- نوشته شده توسط
- یوسف اکبری
- شاعر:
-
ابوالفضل عباسی معروفان
ارسال دیدگاه