ای بشر،عالمه سلطان اولاسان گئتمه لی سن
مالک مُلک سلیمان اولاسان گئتمه لی سن
بیر تَفَکُّر ایله گور خلقتیوین سِرّی ندی
خاک تیره،مه تابان اولاسان گئتمه لی سن
عُمر نوح اولسا نصیبون بو فنا دنیاده
شُهره ی عالم امکان اولاسان گئتمه لی سن
حسنووه ناز ائلمه عمری بئش اون گونلیکدی
بونی بیل یوسف کنعان اولاسان گئتمه لی سن
قالمادی حضرت موسایه ده فانی دنیا
طور سیناده نگهبان اولاسان گئتمه لی سن
گلسه عیساده ئوزی پیرو اسلام اولاجاق
ارمنی یا که مسلمان اولاسان گئتمه لی سن
مصطفی تک بشره دنیا وفا ایلمدی
بیت پیغمبره دربان اولاسان گئتمه لی سن
هانی گور فاتح خیبر کیمی شیر غزوات
سر سپاه شه مردان اولاسان گئتمه لی سن
عرصه ده ائتمه تفاخر قولووین قدرتینه
دهریده رستم دستان اولاسان گئتمه لی سن
قویما مغرور ایلیه چوخدا سنی پُست و مقام
آمر و تابع فرمان اولاسان گئتمه لی سن
گور یزیدی اولوسان یا که طرفدار حسین
دشمن و حامی قرآن اولاسان گئتمه لی سن
عیش و نوشیله باشا وئرمه گوزل گونلریوی
باغ عشرتده غزلخوان اولاسان گئتمه لی سن
چوخلارین چرخ فلک گولدیروب آغلار قویدی
یتمیش ایل عمریده خندان اولاسان گئتمه لی سن
ایندی که حقدی ئولیم محشره سرمایه قازان
صاحب مال فراوان اولاسان گئتمه لی سن
کاخ و ویلاده اوتور قبر ایوینی یادیوه سال
عاقبت خاکیله یکسان اولاسان گئتمه لی سن
اجلین وقتی یتیشسه قاچاجاقسان هایانا
عازم دشت و بیابان اولاسان گئتمه لی سن
هارا گیتسون سنی بیرگون تاپاجاخ عزرائیل
یرین آلتیندا دا پنهان اولاسان گئتمه لی سن
سنده(فرهادی)قیامت گونینین فکرینه قال
(حافظ)و(سعدی)دوران اولاسان گئتمه لی سن
- سه شنبه
- 4
- خرداد
- 1400
- ساعت
- 21:10
- نوشته شده توسط
- یوسف اکبری
- شاعر:
-
حسین فرهادی مراغه ای
جلال بیات