بو گئجه سوز و گداز ایلور علی
یاریلن راز و نیاز ایلور علی
عاقبت گتدیله بیر مرد نجیب
شیعه ناب علی شغلی طبیب
اونا اولمازری طبابتده رقیب
گوردن یاره یتشوبدور قاشینا
آقام ایوای دئدی وردی باشینا
دئدی وار یاره ده زهرین اثری
چوخو میش تیغ جفانین کسری
کاری بیریاره دی چوخدور خطری
بو یارا توختیا امکان یوخدی
آقامین دردینه درمان یوخدی
صود وئرون شاه ولا میل ائلسین
اونی هرصبح و مسا میل ائلسین
قویمیون آیری غذا میل ائلسین
ایلیون دورینی خلوت یاتسین
ائتمیون ناله که راحت یاتسین
یتشوبدور بو خبر ایتامه
چوخی بیلمیردی ندور برنامه
هره سی توکدی بیرآز صود جامه
گلدیلر منزل شاه عربه
محضر حضرته عرض ادبه
بیرنفرسویلدی راحتدی علی
قیدون منع عیادتدی علی
دئدیلر کان کرامتدی علی
خیر ایشیندن دالی قالماز مولا
سائلین بوش یولا سولماز مولا
سائلیک گلمشیگ عرض ادبه
عرضمیز واردی او والانسبه
سیز دیون مطلبی شاه عربه
اولماسارخصت اگر حیدردن
آغلاروخ حالینه پشت دردن
بیز علینن گئجه لر همدمیدوک
چوخ گئجه صبحه کمین باهمدوک
او بیزه بیزده اونا محرمیدوک
بیزدن اصلا بو آقا دویمازدی
بیر گئجه بیزلری تک قویمازدی
دئدیلر حیدره بو عنوانی
سالدی تشویشه شه مردانی
گوزلرین آچدی سخاوت کانی
ایشیدوب ناله و افغانلارینی
ایسته دی محضره مهمانلارینی
آقا وقتی اولارا لطف ائله دی
آتا سیز لار او شهی دوره لدی
هامی گوردن یوزینه اشک اله دی
کاسه صبر یتیمان داشدی
آتاسیزلار هامیسی آغلاشدی
چوخی دیواره وروب باشلارینی
گوردی غمگین آقا یولداشلارینی
سیلدی چوخ لطفیله گوز یاشلارینی
بویوروب بسدی داخی آغلامیون
بویانان قلبیمی چوخ داغلامیون
فکروزی باشدان هله آتمامیشام
سیزی دنیا پلونا ساتمامیشام
سیزه خاطر گئجه لریاتمامیشام
چوخ حساب ایلیون آزخدمتیمی
عفو ایدون اولسا اگر غفلتیمی
داخی یوخ تاب و توانیم ئولورم
آخوری صورته قانیم ئولورم
آز قالوبدور چیخا جانیم ئولورم
من ئولنن صورا یارب گئجه لر
بیلمورم بی کس اوشاقلار نئجه لر
ایسته (احسان)آقادان برگ برات
ذکر اولاندا آدی گوندر صلوات
ایستوسن گر تاپاسان راه نجات
دهریده ایله حذر غیبتدن
جنتین عطرینی آل هیئتدن
- چهارشنبه
- 5
- خرداد
- 1400
- ساعت
- 21:23
- نوشته شده توسط
- یوسف اکبری
- شاعر:
-
احسان بدرخانی
ارسال دیدگاه