عم اوغلی چوخ گول سارالار
آغلاما خداحافظ
بو سن بو ائو بو بالالار
آغلاما خداحافظ
بو ائوده هر درد و غمه
سنده یانموسان منده
یاتانمادیم چوخ گجه لر
سنده آغلادین منده
خیال ایله بیر گولودوق
سنده سولموسان منده
چمنده چوخ گول سارالار
آغلاما خداحافظ
عم اوغلی یانّام بو غمه
اولدی درگهون مقتل
بو نسگلون بسدی منه
فضّیه دئدیم تئز گل
منیم غمیم بسدی سنه
قوی گئدیم بیر آز دینجل
بو سن بو ائو بو بالالار
آغلاما خداحافظ
سنون بیله آغلاماقون
قلبیمی ائله داغلور
سنه باخور گول بالالار
گوز یاشون یوزه باغلور
گوزون یاشون توکمه بیله
آغلاما حسین آغلور
او آغلاسا دل یارالار
آغلاما خداحافظ
حسن بیلور کوچه غمون
قویمادیم دیله سالسون
او کوچه ده اولدی نلر
روز محشره قالسون
گرک گله مهدی بالام
انتقامیمی آلسون
گله حسین قانین آلا
آغلاما خداحافظ
اگر چه آز عمروم اولور
نسگلیم منیم چوخدی
ئورکده هر درد و غمیم
قلبیوی دَلَن اوخدی
ئوزون منی قبره آپار
قارداشیم منیم یوخدی
بو سن بو ائو بو بالالار
آغلاما خداحافظ
او ناگران گوزلرووه
گوزلریم فدا اولسون
من آغلورام آغلاما سن
قویما گوزلرون دولسون
بالالاریم نازینی چک
قویما گوللریم سولسون
تک ائوده قومیا قالالار
آغلاما خداحافظ
گجیله وئر غسل منه
دفن ائله گجه یاری
مزاریمی ایتگین ائله
ای بلا گرفتاری
مزاره قوی تئز گئت ایوه
قویما تک بالالاری
یولووی گوزلر بالالار
آغلاما خداحافظ
حسینیله زینبیمون
غصه قلبینی داغلار
حسینیم اللرده ئولر
زینبیم باخار آغلار
وئرنده جان گوزلرینی
کیم حسینیمین باغلار
عم اوغلی چوخ گول سارالار
آغلاما خداحافظ
- پنج شنبه
- 6
- خرداد
- 1400
- ساعت
- 21:58
- نوشته شده توسط
- یوسف اکبری
- شاعر:
-
احد عدلجوی تبریزی
ارسال دیدگاه