عریان گورنده قارداشینی دختِ بوتراب
یوز دوتدی آفتابه طرف ایلدی خطاب
ای گون ندور بو سوزشون اودلاندی قارداشیم
رحم ایله گورموسن مگر عریاندی قارداشیم؟
بیر آز شرارِ قوّهء ناریّه وی آزالت
آرتورما اوز حرارتیوی یاندی قارداشیم
بی غسل و بیکفن قالوب عریان جنازه سی
یوخ بیر نفر دیسون که مسلماندی قارداشیم
شیرازه دن چیخوب داغیلوبدور ورق ورق
پامال اولان صَحایفِ فُرقاندی قارداشیم
وار گورموسن عوالمِ امکاندا انقلاب؟
قطبِ مدارِ عالمِ امکاندی قارداشیم
ایمانی اولمیانلار ایدور ادّعای دین
بلمولّه اصلِ جوهرِ ایماندی قارداشیم
قرآن کتابمیزدی دیَنلر کسوب باشین
روحِ کتاب و معنی قرآندی قارداشیم
گزلت یوزون ، جمالیوه سال ابریدن حجاب
قانلی شفقده مِهرِ درخشاندی قارداشیم
وار کافر اولسا شرعیده مهمانه احترام
بیر کس ترحّم ایتمدی مهماندی قارداشیم
اولدی مُباح سو بو قوناقدان مضایقه
یاندی سوسوزدان ، اود دوتوب اودلاندی قارداشیم
قانلی گوزی فراته باخور نوکِ نیزه دن
معلوم اولان که ایندیده عطشاندی قارداشیم
نه باشی وار بدنده ، بیلکده نه اللّری
تپراقلار اوسته قانینه غلطاندی قارداشیم
آت دیرناقی ایله داغیدوب ، یغماق اولموری
اعضاسینی ، که خاکیله یکساندی قارداشیم
قانین حلال فرض ایلیوب هر گلن ووروب
بیر پارچا شیشه دن توکولن قاندی قارداشیم
اوخلار اوخ اوستونه وورولوب ، جسمی گزلنوب
یوخ اوخلارین چکن ، دولی پیکاندی قارداشیم
گودالِ قتلگاهی ایله دولدوروبدی داش
گورسنموری جنازه سی پنهاندی قارداشیم
جسمین قویوبلا قسمته قربان تک اهلِ شام
جدّی قویان شریعته قرباندی قارداشیم
آل امیّه ایلمسون دینی مَلعبه
عالَمده مُلکِ دینه نگهباندی قارداشیم
هر بی شرف که بیر یارا ووردی وجودینه
جانان یولوندا عینِ شرف ساندی قارداشیم
بیر دسته آتشی گُله بنزر یارالاری
سویلر گورن صفالی گلستاندی قارداشیم
آللهی ، دینی ، مذهبی انکار ایدنلره
دنیا بوئی مُبلّغِ یزداندی قارداشیم
قارداشمین آدیله مجالس اولار بِنا
احکامِ دین دیولماقا عنواندی قارداشیم
معلوم اولان یانورسان اودور وار حرارتین
آغلا سو سپ جنازه سینه ، یاندی قارداشیم
خاکِ شفادی تربتی دردِ (حسینیه)
هر دردِ بیدوا اولا درماندی قارداشیم
- پنج شنبه
- 6
- خرداد
- 1400
- ساعت
- 22:40
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه