سالدون فلکه شراره ای اوخ
دگدون دل داغداره ای اوخ
گوردون من بی پناهی بی یار
لشکر داغلوب اُلوب علمدار
اولدون منه غم گونونده غمخوار
ای یاور اولان بو زاره ای اوخ
سن پیک خدای لم یزل سن
عاشق ایوینه گلن گوزل سن
گلدون، منه قاصد اجل سن
چکدون منی بزم یاره ای اوخ
سالدون رخ مهر و ماهه هاله
سن گلدون اوجالدی آه و ناله
دوشدی بالا قیزلاریم ملاله
زینب گلوب آه و زاره ای اوخ
بیر دل که او دلده غم لریم وار
گنجینهء حیّ داوریم وار
قارداش غمی داغ اکبریم وار
ووردون او دله شراره ای اوخ
سالموشدی بو غم وجودیمه سوز
گوردون من بیکسی اوغولسوز
قالموشدوم اوزوم بو چولده یالقوز
گلمزدی غمیم شماره ای اوخ
جسمیمده یارا دئمم چوخ اولدی
صاف یئر یارا جسمده یوخ اولدی
بو عرصه ده قاتلیم اوخ اولدی
بو دردیمه یوخدی چاره ای اوخ
قان سجده گهیمدن اولدی جاری
گوز گورمدی قوم نابکاری
نشترله ماقا بو قلب زاری
دوشدون یولا سن دوباره ای اوخ
ظاهرده دل ملوله دگدون
باطنده ولی رسوله دگدون
سینه یارالی بتوله دگدون
ووردون اورگینه یاره ای اوخ
تنها نه بو باغریقانی یخدون
بلکه هامی انبیانی یخدون
محرابده مرتضانی یخدون
دگدون او بزرگواره ای اوخ
گوردون منی سن بو گونده عطشان
ویرمور منه سو گروه عدوان
ایچدیردون حسینه سو کیمی قان
چوخ یانما اورکده ناره ای اوخ
دل ملکنی ای خراب ایدن اوخ
وی بو جگری کباب ایدن اوخ
ای قلب ایوین انتخاب ایدن اوخ
تئز چک اوزوی کناره ای اوخ
آتش دل پرشراره سالدون
زهرا آنامون قرارین آلدون
باتدون اوره گیم باشندا قالدون
یاخدیم قانینی عذاره ای اوخ
اوخ فاطمه نی کباب ایدوبدی
آغ ساچلارینی خضاب ایدوبدی
بیله (حسنی) خطاب ایدوبدی
منصوری چکلّه داره ای اوخ
- دوشنبه
- 10
- خرداد
- 1400
- ساعت
- 14:59
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه