دل ترابه قویاندا حسین حسن یوزونی
بهار ابر کیمی دولدوروب ایکی گوزونی
مکان او صورت مه طلعته تراب اولدی
حسیندن یارالی قارداشا خطاب اولدی
سندنصورا مونس منه فریاد و نوادور
مدفن سنه یثرب منه ده کرب و بلادور
یات بوردا آنام فاطمهء زاریله باهم
منده یاتارام اوردا علمداریله با هم
اوز محرمون اولدی سنه دشمن اوز ایوینده
جانانیوه جان بذل ایلدون سن اوز ایوینده
تکفینوه اقدام ایلدیم من اوز ایوینده
اما منه صحرای بلاده کفن اولماز
جسمیم قوری یرلرده قالار دفن ایدن اولماز
دل یاره دی آخرده کی نسگللی سوزوندن
ایندی نجه آیا گوتوروم گوز بو گوزوندن
نیلوم ندی چارم که یوزوم دونمور اوزوندن
قاسم طرفندن نگران اولما برادر
بیر گوزده دی دنیاده منه قاسم و اکبر
سن قبره یات خاطروی شاد ایدرم من
فرمایشوی هاردا اولام یاد ایدرم من
سندنصورا بو قوسمی داماد ایدرم من
دعوت ایدورم طوی گونونه، گلمه نوایه
گر ممکنون اولسا گلسن کرب و بلایه
سندنصورا قویمازلا قالام اوز وطنیمده
بلبل کیمی شوره گلم آخر چمنیمده
اولماز منی دفن ایلین اولماز کفنیمده
قوشلار منه شهپرلرین آخر کفن ایلر
قارداشون اخا کرب و بلانی وطن ایلر
واردور یری احوالمه قان آغلیا داغ داش
دنیا بوئیجا گلسه گوزومدن یوزه قانیاش
قویدوم اوز الیمله یوزوی تپراقا قارداش
یاتدون اوزون آسوده بئله مدفن ایچنده
قویدون نیه تک قارداشوی دشمن ایچنده
عمرون گونی زهریله یتوب گرچه کسوفه
اما بدنون اولمادی آماج سیوفه
سنسیز منی یالقیزلیه جاق لشکر کوفه
دلدن سالاجاقلار منی باش یاره سی ایله
شمشیریله پیکانیله داش یاره سی ایله
دوزدور که سنون خیمه وی تاراج ایلیوبلر
تیر غمه هم سینوی آماج ایلیوبلر
جبریله وطندن سنی اخراج ایلیوبلر
قان لخته سینی باشیمه چون تاج ایدرم من
باش نیزه ده جدّیم کیمی معراج ایدرم من
اولدی اوز ایوینده آتام اوغلی بیله حادث
قارداش نجه سو اولدی سنون قتلوه باعث
سو اوسته ولی قول قویاجاق نهرده حارث
عرشه اوجالار ناله اوشاقلار عطشیندن
سو اوسته آنائیله بالا کشمکشیندن
سوز یوخ که سنی ظلمیله مظلوم ایلیوبلر
آخرده بو منظوریله مسموم ایلیوبلر
مؤمن لری خوار ایتماقا محکوم ایلیوبلر
قارداش منه ده خارجی آدی قویار اعدا
بو آدیله تا که ویره لر قتلیمه فتوا
سن صلح الدون زنده قالا دینیله قرآن
بو صلحی دوشونمزدی ولی فرقهء نادان
اما منه لازمدی اولام دینمه قربان
اشراره ایشق گوندوزی شام ایتمسم اولماز
دین اوسته شهامتله قیام ایتمسم اولماز
تیره هدف ایتدی سنی گر قوم ضلالت
گل جسموه نچّه اوخ ایدوب یولدا اصابت
واردور منه ده کرب وبلاده بئله ساعت
اشرار جهان تیغله یوخلالّار حسینی
یالقوزلیوب آخرده ده اوخلالّار حسینی
تاپماز (حسنی) گرچه بو شه غملری پایان
یازماق ولی لازیمدی گرک اولمیا پنهان
ایسته سنی تا ایستیه اوز قبرینه مهمان
گور تا که بقیع ایچره یاتوب شاه جگرخون
گیزلین آنانون قبری، اوغول مدفنی پوزقون
- دوشنبه
- 10
- خرداد
- 1400
- ساعت
- 15:11
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه