ای ایچن سو یرینه قان بالا وای
آنان اولسون سنه قربان بالا وای
منیم ای روح و روانیم گوزون آچ
اوجالوب عرشه فغانیم گوزون آچ
سنه قربان اولا جانیم گوزون آچ
قویما وردیم اولا هر آن بالا وای
سینمی ناله ایله داغلامشام
سنله باهم گجه چوخ آغلاموشام
عفو ایله اللریوی باغلاموشام
اولموشام ایمدی پشیمان بالا وای
گلمدی راز دلون لبلریوه
سورتدون هر دمده دلون لبلریوه
قویدون آخرده اَلون لبلریوه
قلبون اود دوتدی سوسوزدان بالاوای
بو اشاره منی یاندیردی بالا
خیمه نی چوخلی دولاندیردی بالا
کیم سنی قانه بویاندیردی بالا
اولدی بیر سنگدل انسان بالا وای
فرقتونله سینمی داغلاموسان
چاره یوللارین اوغول باغلامسون
کوسموسن مندن اودور آغلاموسان
ایده سن ایستیرم افغان بالا وای
نسگل اولدی سودومون اولماماقی
ساخلیانماز آنا سوسوز اوشاقی
یاندی سن تک آناوین دل دوداقی
اولدی سن تک اودا گریان بالا وای
آپاراندا سنی میدانه آتان
آغ گیندیردی سنی اُلسون آنان
اولدی آغ اونّوگوین زینتی قان
اولوب آغ اونّوگون الوان بالا وای
سنه سو ایستدی چون شاه اَنام
حالنی یوخلادیلار لشکر شام
بوغازون اوخلادی بو قوم ظلام
ای اولان دایه سی پیکان بالا وای
باخورام گل بدنون یوخ یاراسی
سینمه وار یاراون چوخ یاراسی
بیله اولماز بالا هیچ اوخ یاراسی
یا کسوب خنجر برّان بالا وای
کیم بیله خانهء صبرون تالیوب
سینمه داغ کیمی محنت قالیوب
اوخ باتوب بو بوغازون پارچالیوب
ایلیوب گل کیمی خندان بالا وای
بختیمون کوکبی باتدی سنیلن
سازشی یوخدی جهانین منیلن
آغلیاندا سنه من شیونیلن
گوله جاق فرقهء عدوان بالا وای
سو یولون هاردان اولور دشمن آچار
کیم دیدی اوخ دلیوی اَمسَن آچار
آغلارام قونداقوی عمّن آچار
اولوب عمّنده پریشان بالا وای
تیر غم سینمه ساچدی بالالار
خیمیه غم یولی آچدی بالالار
سنی گورجاخ بالا قاچدی بالالار
هره بیر یانه هراسان بالا وای
بیر بیره سویلدی سو ایستمیون
اوخلییلّر سوسوزی سو دیمیون
کیمدی قزلاره دِیَن غم یمیون
ایتمیون بیرده سو عنوان بالا وای
اوخشارام من که بو حالیله سنی
بزم ماتمده ده اوخشار (حسنی)
ناامید ایتمه عزایه گلنی
ایسته اوز قبریوه مهمان بالا وای
- دوشنبه
- 10
- خرداد
- 1400
- ساعت
- 15:12
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه