عشقونده اگر چکدیله زنجیره خوشام من
حاشا گتورم بو غمی تقدیره خوشام من
اوّل یازیلان گونده کی تقدیره خوشام من
تقدیر سنون ، بنده سنون ، جاندا سنوندی
زنجیر سنون ، گوشهء زنداندا سنوندی
موسایم و طوریمدی منیم گوشهء زندان
ارنی دیمرم ، لن ائشیدم ای حقِ سبحان
موسای کلیمه هاچان اولدی بئله امکان
ارنی دیمه میش نوروی تابان ایلوبسن
زندانی بو نوریله چراغان ایلوبسن
یوسف دگلم محبسِ غمده داریخام من
صبرین ائله سر حدّینی اشگیله یخام من
اوّلده دوشوب چاهه ، ولی صوندا چخام من
یوسف دگلم عاشقم اوز چاهیمه قالام
بو چاهده وابسته یم آلّاهیمه قالّام
یوسف اولانی رسمدی بازاره چکللر
طوطینی قفسده لبِ گفتاره چکللر
بو قاعده دی خق دئینی داره چکللر
عشق اهلی بو آلامدی اصلا دله گلمز
عشق اهلی بولر عالمینی اوزگه سی بولمز
لطفونله خدا صبر و وفا درسینی آلدیم
عشقونله اوزوم مدتی زندانیده قالدیم
زنجیری سنون بولدوم ، اودور بوینوما سالدیم
گر چه آلور آرامیمی هر بیر نفسیمدن
سالدیم اوزوم بوینوما ، شوق و هوسیمدن
عیسی دگلم چرخه گیدم دار آدی گلسه
بلبل کیمی ناله ائلییم خار آدی گلسه
جان نقدینی تیز ویرم اگر یار آدی گلسه
هجرانه داخی سینه ده یوخ تاب و توانیم
وصله یتیشه چوخ تلسیر مرغِ روانیم..
- دوشنبه
- 10
- خرداد
- 1400
- ساعت
- 16:36
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه