چوخ آغلاما یات ساکت اول اصغریم لایلای
قالموش نجه قوینومدا گور اللریم لایلای
لایلای بالام لایلای گلوم اصغریم لایلای
ملحم قبول ایتمز منیم قلبده یاره م
سن تک سوسوزلوقدان اوغول منده بیماره م
سنده سوسوز منده سوسوز الده یوخ چاره م
قان آغلوری احوالیوه گوزلریم لایلای
توکسون سزادی گوزلریم عارضه قانیاش
یانسون بالا احوالیوه وار یری داغ داش
سسلر رقیه آغلاما ای على قارداش
ای روز شبده همدم مادریم لایلای
سن آغلادون باخدیم سنه آغلادیم یاندیم
آهیله قلب عالمی داغلادیم یاندیم
قونداق ایچنده اللرون باغلادیم یاندیم
سن تک منیمده باغلانار اللریم لایلای
مقراض غم بو رشتۀ صبریمی کسدی
گلزار آل احمده باد ظلم اسدی
قربان اولوم آغلار گوزه آغلاما بسدی
بو چولده سولدی ظلمیله گللریم لایلای
آغلار سنون احوالیوه سود امر آهو
بیر جرعه گزدیم تاپمادیم خیمه لردن سو
غم شاخه سینده قمری تک ایلرم کو کو
ای بو گلستاندا گل پرپریم لایلای
سود اولمادی تا که ایدم دردیوه چاره
دیرناقویله ورموسان سینه مه یاره
هر قدر ترپدّیم سنه غملی گهواره
اشکیم آخوب یوزده یازوب اصغریم لایلاى
باخدوجدا پوزقون حالیوه ایلرم ناله
سالموش سنی سوز عطش بیله بیر حاله
واقف دگول یوخسا عمون بیله احواله
یا اینکه بولمور حالیوی اکبریم لایلای
بیر قدر آرام اول بالا ایلمه شیون
تا که سوسوزلوق دردینه چاره ایلوم من
گر ممکن اولسا سو علی لطف ایدر عمّه ن
یوخدور بولورسن چارۀ دیگریم لایلای
اولسون آنان گل تک سولان رنگوه قربان
بسدور بالا یوردون اؤزون آغلاماقلقدان
آهونله ائتدون سینه می شانه تک شانشان
یوخ بیر سوزوم اولموش فقط ازبریم لایلای
آز آغلا آغلاتما اوغول بو پریشانی
اولسون آنان سنتک على تشنه قربانی
حالون پریشان ایلیوب شاه عطشانی
ای آسمان عشقده اختریم لایلای
- دوشنبه
- 10
- خرداد
- 1400
- ساعت
- 22:2
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه