ای آچمامیش گُلوم منه مینلر بهاریدون
گلزاریم ایچره غنچه ده بیر گلعذاریدون
حسرتدیم شیرین دله شیرین دلیم منیم
گل بیر دله دانش منه ای بلبلوم منیم
آفت یتیشدی باغیمه سنسیز گلوم منیم
یوزدن گلون مثالی سسوندن هَزاریدون
هجرون رقیّه قلبیمی یاندوردی آغلارام
یاده سالوب بلالریوی سینه داغلارام
بیر عمری ماتمونده سنون قاره باغلارام
آخر بو بیکس عمّه وه صبر و قراریدون
سالدی فراقوین اوتی سونمز اوتا منی
یاندوردی یاخدی ایلدی توش بلا منی
آتشفشان اشک ایلیوب برملا منی
قان آغلادان گوزوندی که چون آبشاریدون
ایکاش اجل بو زینبیده غصّه مرگ ایده
سن تک بو قاره کوینگیله توپراقا گیده
یوخدور بیر آیری چاره، بیبون بولموری نئده
بسدور بو بیر اشاره که آگاه کاریدون
دور گور نه نوعی گوزیاشمی قانه قاتموسان
گوزدن اولوب بو عمّه وی تئز گوزدن آتموسان
زهرا مثالی یاره لی قبر ایچره یاتموسان
پیغمبرین عزیزی کیمی زخمداریدون
عفو ایله زینب عمه وی گر تاپمادی کفن
معذوریدور بو بارده ای غرقهء محن
بیر زاد تاپانمادیم بورویَم پیکریوه من
حق ویر بو زاره سویله کی بی اختیاریدون
(هرچند یاندیراردی منی اوتلی سوزلرین
مشغول ایدردی عمّه لرون سنله اوزلرین
عمّن اُلیدی اکبره بنزردی گوزلرین
سن گوزلروندن اکبریمه یادگاریدون)
آخر سنون بو غصّه لرون بیر دگل دییَم
سندن اوتور سزادی اورک قاننی ییَم
قاره سالوب بو باشیمه رخت عزا گییَم
عالم دیسون که غمزدهء روزگاریدون
اکبر باخشلی گوزلریوی یومما آچ گوزون
آچ گوزلرون بو بیکسه سویله قیزیم سوزون
جاندان چوخ ایسترم سنی آگاهسن اوزون
بیر کلمه سویله؛ عمّه منه سن نگاریدون
قان آغلارام غمونده اورک داغلارام قیزیم
سیل سرشکی عارضیمه باغلارام قیزیم
عمرومجه یاد ایدوب گوزیوی آغلارام قیزیم
گوزدن نچونکه شام و سحر اشکباریدون
هرچند ایستمم که دیم کربلا سوزون
یوخ اوزگه چاره عمّه وه، آگاهسن اوزون
حسرت باخاردی کرب و بلایه ایکی گوزون
گوزیاشینی سپردی یولا، انتظاریدون
قسمت اولوبدی عمه وه کربُبلا قیزیم
باشه یتوبدی شامده گویا بلا قیزیم
گوزلور یولون یقیندی شه کربلا قیزیم
دور بیزلریله باشلا سفر بیقراریدون
دور قبریدن منیله گیداخ اکبری گوراخ
شه سینه سینده دفن اولونان اصغری گوراخ
اول قانلی یرده زادهء پیغمبری گوراخ
جان تاپشورونجا حسرت دیدار یاریدون
نسگللرون ربابی قیزیم یاندیرار یاخار
ویرانسراده سن اوتوران یرلره باخار
بوندان علاوه اصغره هی گوزیاشی آخار
اصغرله سن او بیکسه چون غمگساریدون
لیلا سریه ایله اوغول قبرینه گیدر
اکبر هواسی باشدا گینه اولدی دربدر
بیر جمع قاره معجر اولوب منله همسفر
صبر ایله بو فراقه، قیزیم بردباریدون
هر چند روزگاریم اولوب بوردا تیره شام
گر اُلمَسم مدینیه گیتسم دایانمارام
گلّم دوباره ایلییَرم بوردا اخذ کام
سن که بیر عمری عمّه ویلن کامکاریدون
سائل اولوبدی دم ویرن اشعاریوه نگین
سن ذرّه سن او مهر درخشانیدور یقین
بانی اولوب بو نوحیه محمودی حزین
یازدوقجا لطف زینبه امّیدواریدون
- چهارشنبه
- 12
- خرداد
- 1400
- ساعت
- 16:7
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه