ای امام هفتمین موسی ابن جعفر السّلام
ای اولان باب الحوائج وی امام اوغلی امام
لطفوه محتاجدور هستی کماکان هر نَفَس
نفسوه وابسته دور ذرات عالم لاکلام
هانسی بیر بیماردور درمان سنیلن تاپماسین
درد بی درمانینه سندن آلار درمان سِقام
مهر گردون هاردا آرایش ویرردی گلشنه
غنچه وش اول لبلرون گر ایتمسیدی ابتسام
سن او گلسن جنت ایچره اولماسان اولماز شمیم
نکهتوندن جنتُ الاعلا اولوب مشکین مشام
بلکه خجلت چکمسین نور رخوندان آفتاب
اون بیر ایل محبسده ایتدون گوندوزی لیل ظلام
قاف وحدت که دیوبلر سن اونون سیمرغیسان
قاف وحدت مرغی اولماز هیچ زمان پابندِ دام
انتظامون گرچه پوزدی بی مروّت دشمنون
انتظاموندان تاپوبدور ماخلق نظم و نظام
سلطنتدن عزل اولونماز حقّدن منصوب اولان
مُلک عالم سیطرزدن چخمیوب چخماز مدام
استقامتدن دوشردی اولماسیدوز کائنات
سیزدن اولموش آسمان بیستون صاحب قوام
سلطنت تختون زمین دور تاج فرقون آسمان
سن او شهسن شه لر اولموش درگهونده چون غلام
آسمانین توسن دوّاری که اولموش چموش
گاموون آلتندا هر لحظه اولوبدور رامِ رام
بو امیدیلن که اُپسون خاک ایوانون سنون
ایلییَر دور حریمونده ملائک ازدحام
ریزه خوار خوان احسانون نه بیر حاتمدی بس
قاسم الارزاق آلار دست نوالوندن حُطام
مَحرَم کوی محبت دوریوه ایلر طواف
محترم سنلن اولوبدور مُحرِم بیتُ الحرام
رشتهء حبل المتینسن امر ایدوب یزدان پاک
ماسوا ملزَم اولوبلار ایلسونلر اعتصام
فخر ایدوبدور گر هامی صاحب نسب آبائینه
سن کیمین فرزنده فخر ایلوب نبی فخرِ فخام
هر کس اوز علمی قَدَر تعریف و تمجیدون ایدر
بسدی شانونده که سنسن نائب خیراَلانام
مصحف یزداندا که تاپشوردی ختم المرسلین
ذات پاکوزدور یقین تفسیر آیات عظام
اولمیوب رِجس و دَنَس اولماز شئونوزده سیزون
نصّ واضحدور بویورموش کردگار لاینام
سن سلیمان ولاسن حشمتون مافوق درک
حشمت و جاهوندن آلمیش مین سلیمان احتشام
موسیِ طور حقیقت پرتوندن نور آلار
بیر دمون احیا ایدر مین عیسیِ والامقام
مین خلیل اللّهی فیضون ایلییَر اوتدان رها
گر مبارک لبلرون امر ایلیه بَرداً سَلام
اول عصائیکه وروب موسی یاروب نهری گچوب
در حقیقت سندن ایلوب اول پیمبر اخذِ وام
نهر آدی گلدی دوشوب یاده یَلِ نهر فُرات
اونداکی راکبله مرکب نهر آبه ووردی گام
یِل ووروب نهر فراته تا سرینلشدی او آب
سسلنوب یابن علی ای سرور خشکیده کام
لبلرون سوز عطشدن پارچالانمش غنچه تک
کهربا آسا سارالمش بو لبان لعل فام
قویما یانسین قلبوی سوز عطشدن ایچ سودان
قالسین عطشان لبلرون بیر لحظه راضی اولمارام
گوش دل آلدی سویون آوازینی ویردی جواب
التماس ایتمه کنار اول ایتمه هرگز فکر خام
سلسبیل و کوثر و تسنیم تک اولسان مَعین
ایچمرم تا ایچمیوب فرزند کوثر تا وارام
حاشَ لله من ایچم سو، قالسین عطشان سروریم
یوخ مروّت نامهء عباسده بیله مرام
تا سوسوز قیزلار خیام ایچره اَمَر اوز لبلرین
بو سودان دریا قَدَر اولسا بلر نفسیم حرام
آل حیدر تشنه لقدان نه چکوب کیمدور بُلَه
بو سوسوزلوق شرحی تا محشر اولوبدور مستدام
ختم قیل اولماز وفای حضرت عبّاس ختم
بو فنا دنیاده گیتسه بو وفا تاپماز ختام
ای ابوالفضل ای امید و ملجاء اهل بلا
اول کسیک اَللرله گل ایسته خدای ذوالکرام -
قائم آل اللّهین ایتسون ظهورون عنقریب
ذوالفقار حیدری آلسون اَله ایتسون قیام
مطلع شعری ویروب محمودی ذره لقب
دست مهرونله اونون آلامینه ویر التیام
بیر خبیر آدلی جواندا دردی وار ایستر دوا
ویرگیلن درمانینی لطفونله ایتسون اخذ کام
خوشدی ذکر اولسا وثاقی دن که عمرون صرف ایدوب
هیئت موسی ابن جعفرده خلوصیلن تمام
من (نگینینده) سیزه وار عرض حالی لطف ایله
جمله حاجاتیم روا اولسون اَلوزله والسَّلام
- چهارشنبه
- 12
- خرداد
- 1400
- ساعت
- 16:12
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه