چون تَمَوُّج ایلدی دریای عشق
حاصل اولدی گوهر والای عشق
وه نه گوهر بحر اولا یکسر جهان
مثلنی بیرده گورنمز بی گمان
وه نه گوهر خاتم دین زینتی
وه نه گوهر گنج عالم قیمتی
زینت هر گوهر یکتادی بو
مَفخَرِ گوهر فشان دریادی بو
اوزگه گوهرلن اولونماز بو قیاس
قیمتین بولمز بونون گوهر شناس
اهل عالم گر هامی صرّاف اولا
قیمتین درک ایلنمز مطلقا
بو گهر کنز ولاده نابِ ناب
بو گهر زینت فزای آفتاب
بو گهر کنز ولا آرایه سی
بو گهر مخزون دین پیرایه سی
گلشن عشقین بهاران آیه سی
باغ عشقه سایه سالمش سایه سی
باغ دینه غنچهء احمردی بو
میوهء قلب حسین اصغردی بو
دامنینده بسلین بو نوگلی
باغ عشقین نغمه لی بیر بلبلی_
فخر نسوان، بانوی والا جناب
نوعروس حضرت زهرا رباب
سانما اصغر آیت اکبردی بو
سانما اصغر مظهر داوردی بو
کربلا سلطانینون سربازیدور
شاه عشقین یاور و جانبازیدور
مهد عشقین حضرت عیساسیدور
نهضت دین خدا احیاسدور
رهروان عشقه رهبردور بو طفل
سروران خلقه سروردور بو طفل
شاهباز دست شاه عشقدور
طفلدور، اما که جاه عشقدور
زادهء شاه شهادت دور علی
کشتهء راه ولایت دور علی
سیر ایله بیر اصغرین عرفانینه
آلتی آیلقدا یتوب جانینه
لطف یاریله قرین اولدی عجب
سالک حقّ الیقین اولدی عجب
باده نوش ساقی وحدت اولوب
محفل وصل حقه دعوت اولوب
تیر زهرآلودی پیک جان بولوب
محضر یاره اوزون مهمان بولوب
آلمیوب هر چند بیر شمشیر اَله
قانيله سالدی جهانه ولوله
کفره ووردی قانی باطل خامه سین
مُهر ایدوب شاهون شهادت نامه سین
تا جهان وار بیله مُهر اولماز یقین
مُهرِ قانيله ضمانت اولدی دین
عاشقه بیردور نچون شهد و شرنگ
خُمّ ِ محنتده بویاندی رنگ رنگ
ایسته سن شرحین اگر عرض ایلرم
نفسیمه بو مطلبی فرض ایلرم
اونداکی آیریلدی شه اخیامدن
آهی گچدی چرخ ازرق فامدن_
جان به کف اوغلون آلوب اول شاه اَله
یوز قویوبدور فاتحانه مقتله
مرکز میدانه یتدی پیر عشق
تا نشانگاهه آلا بیر تیر عشق
گلدی دوردی روبرو اِسْپاهلن
یاندروب آفاقی دود آهلن
سویلدی کیمدور ایده امر ثواب
بو صغیره بذل ایده بیر جرعه آب
سندیروب سوز عطش لعل لبین
بیر ایچیم سو کافیدور قوم لعین
ناقهء عدلی گلون سیز پیلمون
اشک چشمون قانه ممزوج ایلمون
آتش ظلمی بو گون تیز ایتمیون
نار نمرودی شرر بیز ایتمیون
ناریدن باک ایلیون ای اهل شام
چون کمین ایلوب سیزی اول ذوانتقام
بیر باخون جان اوسته دور اول غنچه وش
اللریم اوسته ایدوب گویا که غش
خیمه گاهی واییلن دولدورمیون
غنچه وقتی بو گلی سولدورمیون
گورمسوز که آهی آه اوسته چکیر؟
گورمسوز کی یوزده کی اشکین امیر؟
گر خیال ایتسز که دیندن چخمشام
یا ستون دینی ناحق یخمشام
طاغی فرض ایتسز اگر سیزلر منی
یا اگر بولسز اگر کافر منی
آند اولا اللهه ای قوم نقار
بیر گناه ایتموب بو طفل شیرخوار
تاب ایدنمز هیچ آنا بو محنته
سالمیون بو شیرخواری زحمته
گر اورک چشمیله باخساز ای سپاه
احمد مرسل ایدور گویا نگاه
آغلوری ایمدی حسین احوالینه
قانه باتمش نوجوانلار حالنه
سویلوری ای امّتیم قان ایتمیون
لااقل بو طفلی نالان ایتمیون
هم سپه هم سرسپاه اُلدورمسوز
بیر فلک انجمله ماه اُلدورمسوز
بو سهانی سیز زواله سالمیون
مهر الندن نجمنی سیز آلمیون
دینوزی دنیایه امّت ساتمیون
بو سوسوز قربانیمه اوخ آتمیون
ویرمسوز گر سیز حسینیم سو ایچه
ورمیون اوخ اصغرین حلقین بیچه
ضایع ایتدوز نسلیمی ای اهل نار
وای اگر عدل ایلیه پرودگار
برده گویا عرض ایدور ای لاینام
بو حسیندور تکلیوب قوم ظلام؟
من مگر تاپشورمادیم بو اُمّته
وار نه علت بیله جور و جرائته
دینینی دنیایه امت ساتدیلار
باش اگوب بی دینه دینی آتدیلار
بو توکولموش قانلاری ای ذوالجلال
حامی ایت ئوز دینوه هر ماه و سال
ایجماعت راه حقدن چخمیون
سرحد ایمانی یکسر یخمیون
گر یوخوزدور مصطفانون کینه سی
من حسینم مصطفا آئینه سی
دین مطلق بو حسینون دینیدور
راه یزدان بو حسین آئینیدور
دین منم قرآن منم احمد منم
قبله گاه و کعبهء امجد منم
آیهء تطهیر حق مصدایم
بیت وحیون بیر چراغ طاقیم
نوریم الله نوریدور تنزیلیده
آدیمی ذکر ایلیوب انجیلیده
نوریمی حق ایستیوب جاوید اولا
تا که حق وار مشعل توحید اولا
نوریمی خاموش ایدنمز اهل نار
نوریم ایلور نور حقدن استنار
بو اوشاقدا نوریمون مشتقیدور
عادی فرد اولسا سو ایچماق حقیدور
سیزده یوخدور فهم اسرار خدا
عامیانه قوی دیوم ای اشقیا
بیر عرب فرض ایلیون ای شیخ و شاب
بو صغیره سیز ویرون بیر جرعه آب
یاندورور گرچه عطش اکبادیمی
خیمه لرده عترت و اَحفادیمی
لیک اصغر حالی اوزگه حالیدی
حالیمی پوزقون ایدن احوالیدی
بیر نفر بو طفلی سیراب ایلسون
سو ایچوب بلکه بیر آز خواب ایلسون
حالینی بو طفل زارین یوخلیون
سو ویرون صوندان بوغازون اوخلیون
پوزدی شاهین حال حال لشکری
رحمه گتدی رحمسیز دشمنلری
اشگریز اولدی قوشون بی فاصله
بعضی لر آلدی او دم دستمال اله
مختلف اولدی قوشون آرائیده
غرق اولوبلار جمله آه و وائیده
لشکر ایچره انقلاب اولدی او دم
بیر بیره سویلردیلر قوم ظلم
بیر سوسوز طفلیله بیز جنگ ایتمروخ
عرصه نی بیر طفله بیز تنگ ایتمروخ
گر بو طفلین جانی گیتسه تابدن
چوخ اوزاقدور غیرت اعرابدن
گوردی سعد اوغلی چتیندور مسأله
سسلدی هاردا قالوبدور حرمله
بس ندن بو بیکسه ویرمور جواب
گورموری آیا دیور هی آب و آب
بُلدی تا سعداوغلی مرامین حرمله
همت ایتدی کونه سالسون ولوله
آیریلوب فوج سپه دن اول زمان
ایلسون پیغمبر اوغلون باغریقان
بیر اوتانموب حضرت داداریدن
فکر ایدوب که یاری آلسون یاریدن
سچدی ترکشدن او دم بیر تیر ناب
زهریله ویرمیش اونا چوخ آب و تاب
تیر یوخ گویا که بیر شمشیریدی
آبدیده بیر سووارمیش تیریدی
گر وورا بیر شیره بو تیری، یقین
جانیدن بیزار اولار شیر عرین
قویدی تا تیرین کمانه حرمله
دیزلرین ووردی یره بی فاصله
زوریله تیری چکوب تا اول زمان
دل آچوب فریاد ایدوب دلسیز کمان
وورما بو تیری حیا ایله اوتان
یوخدی بو طفلین گناهی بیر دایان
اصغرین گوزلور آناسی حرمله
اولما راضی ساچلارین آلسون اَله
باجیسی آغلار قالار اللهه باخ
خیمه لردن عرشه چخمش آهه باخ
قویما گل آغلار رقیه باجیسین
سالما طوفانه بو امت ناجیسین
گل بو طفلی قانه غلطان ایلمه
سو که یوخدور گلگلن قان ایلمه
وای اگر بو اوخ نشانگاهه دگه
وار یقین پیغمبرین قدّین اَگه
سایدی نه پیغمبری نه داوری
آغلادوب زهرانی میر خیبری
حلقنی دوتدی هدف ایتدی رها
باشنی جنتده آچدی مجتبا
اوخ چخوبدور شصتیدن اولدی روان
قاره یل اسدی اولوب تیره جهان
دورمادی، فریادیلن ایوای دیدی
گلدیقیجان اصغره لای لای دیدی
لاجرم اولدی قضایه رام او اوخ
گوزلرین یومدی گوروبدور چاره یوخ
جبریله اوز اختیاریندن گیچوب
گلدی بیر باش لاجرم حلقین بیچوب
دگدی اوخ دیسگیندی اصغر آغلادی
خیمه ده قلب ربابی داغلادی
حلقی بچدی شه قولونداندا دگوب
قامتین بوکدی او دم قدین اگوب
قان قاریشدی بیر بیره بیر تیریله
ظلمه باخ بیر ماجرایه سیر ایله
فکر ایدوب شه خاری گلدن تئز دره
بیر اوج دلدارینه گل گوندره
گوردی اوزگه طرزیلن قان موج ایدر
چکماقیلان قان هوایه اوج ایدر
احتیاطیله چکوب تیری او شاه
تیری چکدوقجا چکوب آه اوسته آه
دوتدی اوجوندا او قانی ثار حق
ایلدی گلدسته تک ایثار حق
چکدی قانین زلفونه گل صورته
غرق اولوب دریای درد و محنته
پوزدی اصغر حالی شاهین حالنی
گوردی اصغر شاه دین احوالنی
ایستدی شه قلبینه تسکین اولا
بیر تبسّم ایلدی دلسیز بالا
بو تبسمده نلر وار ایخدا
بو تبسم مثلی اولماز مطلقا
بو تبسّم فتح و نصرت آیه سی
بو تبسّم کاخ دینون پایه سی
بو تبسّم مین بشارتدور یقین
بو تبسّم راز حیرتدور یقین
بو تبسّم صبر ایوب آیه سی
بو تبسّم مرغ همت سایه سی
بو تبسّم رمز پیروزی دین
بو تبسّم آیت فتح المبین
بو تبسّم ابتسام لم یزل
بو تبسّم جلوهء صبح ازل
بو تبسّم معنی اتمام نور
بو تبسّم آیت یوم سرور
بو تبسّم رمز اسرار خفی
راز خلقت اوندا اولموش مختفی
بو تبسّم آغلادار عالم لری
ایله کی آغلادی شاه بی سری
رمزیله اولدی او دم گویا علی
آندیروب ایمائیله گویا علی
غم یمه ای لشکری مغلوب اولان
دشمنه غالب اولوبسان بو زمان
پوزما حالون ای شه گردون مدار
بو سوسوز قربانه ایله افتخار
پوزما حالون اولما بیله دل ملول
بو قوزی قربانی حق ایتسین قبول
کاش مین جانیم اولا ای تاجدار
مقدمونده تا ایدم من خاکسار
شکر لله ای شه ملک ولا
اولموشام قربانی کوی وفا
تا که بولدوم مقصدون ای جان پاک
سویلدیم گهوارده روحی فداک
غم یمه ساینده محشر ایلدیم
محشر کبرانی اصغر ایلدیم
وورموشام بیر تیشه کاخ ظلمه من
ریشه کن اولسون هامی جور و فتن
سنّیده گرچه صغیرم ای بابا
کشور عشقه امیرم ای بابا
ذرّه ام امّا سنه چون بندییَم
تا ابد خورشید تک تابندییَم
بو قزل قان که سنه اولدی نثار
زنده ایلر قانوی ای جان نثار
سیل اولار قانیم یخار کفرین ایوین
تا ابد معمور اولار بنیان دین
قانمیله جویبار دین دولار
باغ دین بو قانیله سیراب اولار
قانیمیون قدرین بولر علّام غیب
قیمتی یوخدور بونا یوخ شک و ریب
گرچه توکدی قانیمی بو قوم کین
باک یوخ ای پادشاه ملک دین
ملکوه بیر کاخ عزّت قورموشام
شهر عشقه طاق نصرت وورموشام
بولموشم چون فتحوی حق الیقین
سپمیشم من خاکوه لعل ثمین
گورمیوب بیله نثاری ذی بصر
بیرده مثلین چوخ چتین گوزلر گورر
بو توکولموش قانیمین پاداشنه
بیرده دیده مدن آخان گوزیاشنه_
ایسترم حقدن که قانین باتماسین
پرچمین تا واردی خلقت یاتماسین
نوروون هر گون ضیاسین آرتورا
قانوون هر دم جلاسین آرتورا
فلکوه وسعت ویره دست ازل
دم به دم ایتسین هدایت لم یزل
کشتی امن خدا سنسن بابا
فلک امّید و رجا سنسن بابا
منده لطفونله سنون ای ناخدا
اولموشام بیر بادبان رهگشا
مین بلا گلسه منه خوشدور بابا
حلقده مین تیره یر بوشدور بابا
سهلدور حلقیم، اگر مین لر خدنگ
ایلسه بو روحیمه بو جسمی تنگ
آه آتشناکی خاموش ایلرم
هر خدنگین مقدمین بوس ایلرم
حلقیمه مین لر خدنگ ایتسه نشست
قویمارام قانون باتا ای حق پرست
حیف نازکدور بابا عطشان گلو
تا که ووردی حلقیمه تیرین عدو_
حلقیمی سوکدی دایانموب تیر کین
ساعدیندن دگدی ای سلطان دین
محضرونده حشری اعلان ایلدیم
جانیمی جانانه قربان ایلدیم
اوزگه عالمدور بو صحراده عیان
چوخ وجوده بو یر اولموش میزبان
بو چوله ایلور تماشا انبیا
اولیا و اوصیا و کبریا
عشقوه سیر ایتماقا عیسی گلوب
حالوه غبطه ایدن موسی گلوب
لوط و صالح هم ذبیحیله خلیل
نوح دریا دل همان شیخ جلیل
یوسف و یعقوب و ایوب صبور
جدّیم احمد مرتضا شاه غیور
عشقوه تحسین ایدوللر بو زمان
حالوه غبطه یییوللر بی گمان
دوزموری امّا اورکلر بو غمه
جمله سی غرقه اولوبلار ماتمه
آغلوری بو حالته هر بیر نبی
صورته لطمه وورور هر بیر وصی
بیر طرف سارائیله حوّا گلوب
لنگ لنگان اوز آنام زهرا گلوب
محسنی آلموش بیر اللی دوشینه
ایستوری آلسین منی آغوشینه
هم منه هم محسنه لای لای دیور
وای بالام ایوای بالام ایوای دیور
آغلادی توکدی حسین گوز یاشنی
سینیه باسدی او دمده باشنی
سویلدی بو حاله من قان آغلارام
گر میسّر اولسا یاره ن باغلارام
بو یارا مرهم گوتورمز ای اوغول
آگهم مرهم بیتیرمز ای اوغول
صبحدن من گورموشم چوخ یاره لر
یاره لردن جسم پاره پاره لر
گورمدیم اما بیله اوخ یاره سی
یاره وون یوخدور اوغول هیچ چاره سی
ویرمدی دشمن سنه بیر جرعه آب
وای اگر بُلسه بو احوالی رباب
بیله بولمه حالوه یوخدور یانان
گورسه قان آغلار بیله حالی آنان
سیل اشکین بحر تک پرموج ایدر
ناله سی طاق سمایه اوج ایدر
من امامم صبر قیلّام حالوه
بُلسه قان آغلار آنان احوالوه
بیله محنت بیله صبر و اصطبار
گورمیوبدور بیرده گورمز روزگار
بیر آتا بیله مصیبت گورمیوب
قلبنی آماج محنت گورمیوب
حالیمی بُلمز حبیبیمدن سوا
بیله حاله بیرجه عالمدور خدا
یوز دوتوب درگاه حیّ و حکمته
عرض ایدوب سن شاهد اول بو حالته
هیچ گل اولماز بیله پرپر ای خدا
حلقی بیچمز بیله خنجر ای خدا
حالیمی گرچه پوزوبدور اکبریم
اکبری یاددان چخاردوب اصغریم
بیر زادیم قالمور داخی من گوندرم
سن اوزون آگاهسن ای ذوالکرم
هر نه ویردیم من دیمم من ویرمیشم
هر نه واردور سن ویروبسن ویرمیشم
بو قانی ساخلا امانت ای خدا
لطفویله ویر ئوزون چوخلی بها
بیله قان که تحفه گوندردیم سنه
عمده اسباب شفاعتدور منه
واقف اسرارسن پروردگار
نیلییر محشرده بو مظلوم ثار
بو قانن واردور بیر اوزگه قیمتی
بَللنر قوپسا قیامت قامتی
اونداکی جرم اهلی واویلا دییر
شیونیله جمله وانفسا دییر
بو قانن بیر قطره سی ایلر کفاف
اهل عصیانی ایدر اوتدان معاف
هر او قان که ویردی اصحاب حسین
خون واحددور یقین ای نور عین
تا بلا نیرانی اولدی شعله بیز
اتحاد ایتدوخ بلا دشتینده بیز
جمله شاباش ایلدوخ باشیله جان
اولّارین اوسته بیله ارزنده قان
بو رضیعون حالنه آغلار مدام
هم یر اهلی هم گوی اهلی صبح و شام
بو سپیلمیش قان حسینون قانیدی
قانی قانی، جان حسینون جانیدی
صاحب اول بو قانه ای معبود من
آلگلان قانین بونون ای ذوالمنن
بو #نگین خاتم عاشوریدور
بو ندای محشر بی صوریدور
تحفه گوندردیم سنه بو قانی من
آل قبول ایله پیمبر جانی سن
شه ایدردی درد دل معبودیله
محرم و درمانیله ، مقصودیله
خالق بیچونیدن گلدی جواب
یا حسین ای شافع یوم الحساب
تحفه وی ایتدیم قبول ای شهریار
ساخلارام بو تحفه نی من یادگار
تحفه وین آثارینی قیلّام شفق
هر گجه دلخون اولار بو ماخلق
تحفه وی من ساخلارام گنجینه ده
نعشنی سنده نهان ایت سینه ده
سرّی صوندان فاش اولار ای کُونه پیر
اوندا کی قلبون سوکر اوچ شعبه تیر
لاله تک باشی آچلمش یاره وه
سینه ده سانسیز ساچلمش یاروه_
یاخشی بیر مرهم اولار بو شیرخوار
گورمیوب بیله طبابت روزگار
اوز جانین تک آل بو طفلی سینه وه
لعل تک زینت ایله گنجینه وه
یاحسین غم ایلمه سولدی گلون
یا که مخیمده سیزیلدار بلبلون
بو سوسوز قربان خدانون قانیدی
سرّ مظلومیّتون عنوانیدی
ئوز الیملن قورموشام بیر آسمان
آسمان اولماز بیله ای مهرِ جان
آسمان بنیاد اولوب میزانیله
ابرلر ایجاد اولوبدور قانیله
بو گویه من ویرمیشم بیر آفتاب
آفتابی سنسن ای نیّر مآب
ماهین ایتدیم من ابوالفضل غیور
بیله بیر مه گورمیوب چشم دهور
چرخنی من نجم باران ایلدیم
زینتین عیّوقِ یاران ایلدیم
گوردوم ایستر بیر سها نجمی بو چرخ
یعنی که بیر پربها نجمی بو چرخ
بو سهایه قرعه ووردوم اصغری
منطوی ایتدیم بونا مین اکبری
روحنی خلق ایلدیم بی منتها
مستفیض درگهی اهل سما
منتهاسیز خلقیلن اولسا قیاس
ربّیله ممکن دگور یوخسا قیاس
بو سها مین مُهره بازی ایلییَر
لحظه لحظه تازه بیر جامه گییَر
صادقه عزّت لباسین گییدیرر
کاذبه ذلّت لباسین گییدیرر
خلق آرا معیار ایماندور بو طفل
مظهر مرموز یزداندور بو طفل
هر او کس منکر اولا بو رتبته
یوخدی راهی آستان رحمته
چونکه ابلیس لعین ادباریدن
منکر حقّ اولدی گچدی یاریدن
اول فصیل ناقه دن بو شیرخوار
آز دگور ای عاشق والاتبار
من بو طفلین قاننی آلّام حسین
بو قیامت مثلینی سالّام حسین
منتقمدور اسم پاکیمدن بیری
جان قوتارماز ریح و خاکیمدن بیری
بو ایشین وار حکمتی صبر ایت حسین
سعی قیل میعادیمه تئز یت حسین
بو رضیعون اولمادی سیراب اگر
یتمدی بو لعل نابه آب اگر_
غم یمه ای چشمهء آب حیات
ایلرم بو طفلی من بحر صفات
هر صفاته بحر بی پایان اولار
فعل ذاته مظهر یزدان اولار
ایلرم باب الحوائج اوغلووی
دردمندانه معالج اوغلووی
مین عجایبلر ایدر بوندان بروز
فعلنه خیره اولار چشمان روز
کاملا آگاهسن ای حق پرست
تیر غیرت دور بونا ایلوب نشست
یوخسا قیلّام ماسوانی بحر آب
گلمیه تا عرشه بانگ آب و آب
امتحانسیزدا حسینیمسن منیم
چشمه گاه فیض و عینیمسن منیم
لیک وار بو عرصه نین چوخ حکمتی
بیر باخشدان ذات حقّین غیرتی
بیر جهتدن عشقوون اندازه سی
ظاهر اولسون ایستیرم آوازه سی
واقف اولسون ماسوا میزانیوه
عشقوه ایثاریوه ایمانیوه
ایستیرم قرآنی اجرا ایلییَم
بو اُلومله دینی احیا ایلییَم
ایستیرم ذاتین ایده هر کس بروز
آیریلا اهل شب و مردان روز
بو قیامون عالمه کشتی اولار
کشتی ایچره اهل حق بیربیر دولار
بو قیامون مین قیامت خلق ایدر
کسب همّت نهضتوندن خلق ایدر
حکمتیم قویماز اولا دین پایمال
قانلاروز احیا ایدر ای خوشخصال
خونیهایم بو توکولموش قانلارا
خاک و خون ایچره یخلمش جانلارا
بو توکولموش قانلارون وار قیمتی
قطره سی ایلر شفاعت امّتی
خاصّه بو عطشان علی اصغر قانی
قانینه غلطان علی اصغر قانی
کیمسه نی چوخ سویسه یزدانِ وحید
اوز یولوندا ایلییَر مطلق شهید
ارزش دینیم گرک افشا اولا
قانلاروزلا دین حق احیا اولا
درک ایده بو نکته نی خرد و کبار
دینینه قویموش نه قیمت کردگار
دینه خاطر خاتم پیغمبران
مین بلایه توش اولوبدور هر زمان
دینه خاطر اولیانون شاهنی
محنته سالدیم اوجاتدیم آهنی
دینه خاطر نوحی سالدیم محنته
عمروجه توش ایلدیم مین زحمته
دینه خاطر عیسیه جان ویرمیشم
خلق ایچنده روح ایمان ویرمیشم
دینه خاطر اولدی موسای کلیم
قوم اسرائیله هادیّ ِ سلیم
دینیمه خاطر خلیل حق پرست
آتش ایچره ایلدی گُل تک نشست
دینیمه قطعاً حمایت ایلرم
اهل دینه من عنایت ایلرم
هر او کس یوز دوندره بو دینیدن
ئوز ئوزین محروم ایدوبدور کینیدن
دین حق بیردور اَیا محنت مآب
دین حق اسلامدور، اسلامِ ناب
حیّ قادر وعدیه ایفا ایدر
ئوز مبارک دینینی احیا ایدر
فوج فوج ایستر هامی اذن دخول
فرع قالماز بیر قالار اصل الاصول
بو گونون مثلینده ای نور خدا
بو قیامین مثلینه ویرّم ندا
سن که نوریمسن منیم ای جانِ پاک
بو گونون مثلنده قیلّام تابناک
نوریمی تکمیل قیلّام نوریله
گر هامی اکراه ایده مین زوریله
بو سوزون شرحی مفصّل باب دور
باب یوخ مین لر کتاب ناب دور
شرحنی مجمل ایدر قدرت اَلی
اوندا که ظاهر اولار حجت اَلی
نوحه نی تعقیب ایله بسدور (نگین)
بحریده گرچه سوزون خسدور (نگین)
شاه دین قویدی او دم اوغلون یره
بلکه اصغر جاننی راحت ویره
قان ایچنده ال ایاق چالدی او طفل
اوز آتاسی طاقتین آلدی او طفل
ال ایاق چالدی بالا باخدی آتا
یاندی قلب شاه دیح وامحنتا
گر دیلی اولسیدی سویلردی یقین
غم یمه بو حالیمه ای شاهد دین
یاخشی بو حالی آنام بولمور هله
گورسه بو حالی یقینمدور اُله
سن بولورسن ای محندن دلفکار
گورسه بو حالی نه احواله قالار
ایش چتین اولدی بابا سن آغلاما
قلبوی بو محنتیله داغلاما
آغلاسان آغلا ربابون حالنه
وای بیبیم ایوای آنام احوالنه
باجیلار آغلار منه سن آغلاما
آهویله عالمینی داغلاما
بو زبان حاله تا گویا اولوب
حلقینین قانی دهانین دولدوروب
چوخ چتین اولدی نفس آلماق اونا
یتدی نگه اصغرین عمری سونا
بیر باخشلا شاه دینی داغلادی
حسرتیله چشم نازین باغلادی
روحی پرواز ایتدی اول دم گوگلره
شاه دین حسرت قالوبدور اصغره
شاهین آغلاردی ملک لر حالینه
شیرخواره اصغرین احوالینه
اصغره لای لای دیه لعیا گلوب
باش آچوب ایوای دیه حورا گلوب
آه و وا ایتدی ملک لر سربسر
بیله ظلمون مثلین آیا کیم گورر
زلفنی یولدی بوتون حوران پاک
سینه سین ایتدی تماماً چاک چاک
عرض ایدوبلر التماساً داوره
صبر ویر بو زادهء پیغمبره
صبرین افزون ایله ای پرودگار
بیله حال اولماز بیله بیر گیر و دار
اونداکی امر ایلدون من ایستیرم
بیر خلیف خلق ایدم ای محتشم
بیز ازلده ایلدوخ بیر قیل وقال
عفو قسل سن بیزلری ای ذوالجلال
بیز دیدوخ اوندا سنه آیا مگر
ایستیسن قان آخدورا نسل بشر؟
بولمدوخ بو طرزیله زاد بشر
عشقنی عالملره اعلان ایدر
سن بولوردون سرّینی بو خلقتین
بی شمارش رازینی هم حکمتین
بو حسینون عشقی بیحددور خدا
چوخ چتیندور کُنهنه بیر کس چاتا
بو حسین عشقی بیزی مبهوت ایدوب
سطح خاکی مسجد لاهوت ایدوب
بو اوشاق که روحی پر آچمیش گویه
پرچم درد و الم ساچمیش گویه
جسمی دفن اولسا اگر خاک آلتنا
روحنی بذل ایت بیزه ای ذوالعلا
آغلیاخ حشره کیمی ایوای دیاخ
وای دیاخ ایوای دیاخ لای لای دیاخ
بلکه بیر اصغر یاتوب خواب ایلیه
بیر بیله آلامیله تاب ایلیه
اولدی بو خواهش خدادن مستجاب
حق ویروب بو خواهشه عالی جواب
فاطمه گویا انوب گوگدن یره
بو دعایه لطفیله پاسخ ویره
روحنی تا که آپارسین گوگلره
بو آپارماقلان گویه مژده ویره
گلدی گوردی اصغری قان ایچره دور
سسلدی یاتما بالا بیر آنی دور
یاخشی باتدون قانوه اصغر اوغول
قالماسون یولدا گوزی اکبر اوغول
قانیله رنگین اولوب گل صورتین
آغلادار اهل جهانی حالتین
بیر گوز آچ باخ بیر آتان احوالنه
آغلادور اهل سمانی حالنه
محسنیم گرچه علی اولدی تلف
اولمادی اما بیله تیره هدف
گوزلریمده سیل، سرحدّین یخوب
قانه باتدون محسنیم یادان چخوب
آغلارام تا حشر اولونجا حالوه
قانه باتمش پرلرونله بالوه
تا بوغازوندان دگوب تیر سه پر
قان داشوب هر بیر یانا ای سودامر
قونداقون یکسر علی قانه باتوب
اوز آتان شوریله افغانه باتوب
بلمورم آیا حسینه آغلیوم
نسگلونده یا که سینه داغلیوم
بولمورم آیا سنه قان آغلیوم
یا بوغازوندا یارانی باغلیوم
یاروه جنّتده مرهم باغلارام
ایمدی امّا حالوه قان آغلارام
تا گوزوم دوشدی بوغازدا یاروه
گوشیدن گوشه بو حلق پاروه
محسنیم یاددان چخوب بیرباش علی
آغلورام بو حالوه قانیاش علی
بیر الیم قاخمور علی قان آغلارام
بیر الیمله من یاراوی باغلارام
مرهمه حسرت قالا بو قوم کین
حشره تک دورماز قانی بو حلقوین
بو یارا مرهم پذیر اولماز، مگر
قانوه قان ایلین مهدی گلر
منده سسلردیم اونی روز بلا
اونداکی قالدیم در و دیوار آرا
سسلنردیم مهدی گل آل قانیمی
بی وفا امّت آلولّار جانیمی
خاره گُل اولدی هدف ایوای منه
محسنیم اولدی تلف ایوای منه
محسنیم اُلدی، بو دم ایتدیم یقین
اصغری قانه بویار اشرار کین
اوندا بلدوم مطلبی فاش و علن
شاهدم امّا بعینه ایمدی من
گوزلریم گورمور ولی ای سودامر
گر آنان گورسه بو حالی بس نئدر
دور گیداخ گویده ملک لر گوزلوری
موپریشان جمله اصغر گوزلوری
الغرض بو حاله قان آلوب ملک
شیون و شینیله دولدی نه فلک
استجابت اولدی یکسر ادعیه
جنّت ایچره تازه لندی تعزیه
اصغرین روحی اولوب جنت نشین
پیکری قالدی النده شاه دین
آز قالوب صبرین سمندین پیلیه
شاه دین حیران قالوبدور نیلیه
- چهارشنبه
- 12
- خرداد
- 1400
- ساعت
- 17:30
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه